نۇرلان ەرىمبەتوۆ، ساياساتتانۋشى:

نۇرلان ەرىمبەتوۆ، ساياساتتانۋشى:

– شىندىعىندا، حالىقتىڭ اراسىندا ارنايى قىزمەتتەرگە، قۇقىق قورعاۋ ورگاندارىنا تەرىس كوزقاراس قالىپتاسقان. الايدا قينالعان تۇستا باراتىن جەرىمىز سول ءتارتىپ ساقشىلارى مەن قاۋىپسىزدىك قىزمەتكەرلەرى بولماق. بۇرىن كەڭەستىك كەزەڭدە بۇل سالانىڭ قىزمەتكەرلەرىنىڭ شىنايى ءارى جاعىمدى وبرازى جاسالدى. توم-توم كىتاپتار مەن شىتىرمان وقيعالى فيلمدەر ءتۇسىرىلدى. قازىر ارنايى قىزمەت ورىندارى مەن حالىقتىڭ اراسىندا بايلانىس ءۇزىلىپ قالعانداي كورىنەدى. سوندىقتان ريحارد زورگە مەن شتيرليتستەردىڭ قازاقى وبرازىن جاسامايىنشا ارنايى قىزمەتكە حالىقتىڭ سەنىمىن قالىپتاستىرۋ مۇمكىن ەمەس. ەستەرىڭىزدە بولسا، 90-جىلداردىڭ باسىندا قىزىلوردا وبلىسىنىڭ تەرريتورياسىندا جولاۋشىلار مىنگەن اۆتوبۋستى قىلمىسكەرلەر باسىپ الىپ، شىمكەنتكە قاراي بارماقشى بولدى. مەنىڭ ۇلتتىق قاۋىپسىزدىك كوميتەتىندە ىستەيتىن دوستارىم سول وپەراتسياعا قاتىستى. جولدا قىلمىسكەرلەر تاماق سۇراتقان ەكەن، ارنايى قىزمەت ورىندارىنىڭ جىگىتتەرى ولارعا سۇراتقاندارىن بەرگەن بولىپ، اۆتوبۋستىڭ سالونىنا ميكروفوندى ورناتىپ ۇلگەرگەن ەكەن. شىمكەنتكە جەتكەنشە تىڭ تىڭداعان قاۋىپسىزدىك قىزمەتكەرلەرى قىلمىسكەرلەردىڭ ارقايسىسىن قاي جەردە وتىرعانىن انىقتاپ، ءساتتى شابۋىل ۇيىمداستىردى. سول وقيعانىڭ سوڭىندا اسقان شەبەرلىكپەن بىردە-ءبىر ادامدى شىعىنعا ۇشىراتپاي، تەك قىلمىسكەرلەردى جازالادى. مىنە، ەرلىك! وسىنداي ومىردەن الىنعان وقيعالار نەگىزىندە فيلمدەر ءتۇسىرىپ، كىتاپتار جازىپ، ارنايى قىزمەتكەرلەردىڭ وبرازىن جاساۋ كەرەك دەپ ويلايمىن.

باقىتجان ەرتاەۆ، حالىق قاھارمانى:

– ءسىز ەسىمدەرىن اتاپ وتكەن ەكى ازامات تا ەلىنەن جىراقتا جۇرسە دە، ەلىنە، جەرىنە قىزمەت ەتتى. تىسقارى جۇرسە دە، ەلىنىڭ تاپسىرماسىن ورىنداۋعا جاندارىن سالعان. ءوز بورىشتارىن اتقارىپ جۇرگەندە قانشاما قيىنشىلىقتارمەن بەتپە-بەت كەلدى. ءبىر سوزبەن ايتقاندا، ولاردىڭ جاستارعا ۇلگى بولاتىن قاسيەتتەرى كوپ. تاۋەلسىز قازاقستاننىڭ دا ءدال سونداي تۇلعالارىنىڭ وبرازىن جاساۋىمىز كەرەك. ءبىز سولاردى كەڭىنەن ناسيحاتتاۋ ارقىلى جاستارىمىزدى پاتريوتتىققا تاربيەلەي الامىز. ارنايى قىزمەتكە دەگەن حالىقتىڭ سەنىمىن قالىپتاستىرۋ ءۇشىن بەلگىلى ءبىر جاعىمدى وبراز كەرەك تە شىعار.

ايدوس سارىم، ساياساتتانۋشى:
– مەنىڭ ويىمشا، بۇل سالا قىزمەتكەرلەرى تۋرالى فيلم ءتۇسىرىپ، دابىرا ەتۋ دۇرىس ەمەس. حالىقتىڭ سەنىمى ولاردىڭ جۇمىسىنىڭ ناتيجەلەرىنە قاراپ قالىپتاسادى. قازىرگى ۋاقىتتا مەملەكەتتىك قىزمەتتە سول ارنايى ورگانداردىڭ ادامدارى وتىرعاندا، جەمقورلىق تاعى باسقا سوراقىلىقتار انىقتالىپ وتىر. سوندىقتان وبراز، يميدج جاساۋعا تىرىسقاننان گورى ولاردىڭ جۇمىستارىنىڭ دەڭگەيىن كوتەرگەن دۇرىس شىعار. سەبەبى قازىر حالىق اراسىندا ەكىۇداي پىكىر بار. ولارعا دەگەن سەنبەۋشىلىك بار، سونىمەن قاتار ۇرەي باسىم. مەنىڭ ويىمشا، ارنايى قىزمەت تازالىق، ادىلدىك، جاۋاپكەرشىلىك بولعان جاعدايدا عانا حالىقتىڭ سەنىمىنە يە بولا الادى.

ازىرلەگەن جارقىن تۇسىپبەكۇلى
“الاش ايناسى” گازەتى 14 شىلدە 2009 جىل