پرەزيدەنت قاسىم-جومارت توقاەۆ "قازاقستان رەسپۋبليكاسى قارۋلى كۇشتەرىنىڭ ارنايى وپەراتسيا كۇشتەرىنىڭ قولباسشىلىعىن قۇرۋ تۋرالى" جارلىققا قول قويدى.

ەلدە ارنايى وپەراتسيا كۇشتەرىنىڭ قولباسشىسى لاۋازىمى پايدا بولدى. مەملەكەت باسشىسى جارلىققا 19 قاڭتاردا قول قويدى.

بۇعان دەيىن توقاەۆ قازاقستاندا اسكەري بارلاۋدى كۇشەيتۋ كەرەك ەكەنىن، ول ەل باسشىلىعىن سىرتقى جانە ىشكى قاۋىپتەر تۋرالى ۋاقىتىلى جانە سەنىمدى اقپاراتپەن قامتاماسىز ەتۋى قاجەت ەكەنىن ايتتى.

"ماڭىزدى مىندەت مەملەكەت باسشىسىنىڭ جارلىعىنا سايكەس قۇرىلعان ارنايى وپەراتسيا كۇشتەرىنىڭ قولباسشىلىعىنا جۇكتەلەدى. ونىڭ الدىندا بارلىق ۇيىمداستىرۋ شاراسىن قىسقا مەرزىمدە قابىلداۋ جانە باسقا دا كۇش قۇرىلىمدارىمەن بىرلەسىپ ارنايى وپەراتسيالاردى ورىنداۋعا ازىرلىكتى قامتاماسىز ەتۋ مىندەتى تۇر", - دەدى اقوردانىڭ ءباسپاسوز قىزمەتى وكىلى 19 قاڭتاردا.

Abai.kz