بۇگىن ۇكىمەت باتىستاعى 4 وبلىستى دامىتۋدىڭ 2022-2025 جىلدارعا ارنالعان جوسپارىن قابىلداپ جىبەردى. 15 تريلليون تەڭگە! بىراق اكىمدەردىڭ ءسوزى مۇلدەم كوكەيگە قونبادى. سول باياعى ۋادە: جوندەيمىز، سالامىز، باقىلايمىز. قاتىراتىن بولسا بۇعان دەيىن قايدا قالدى؟! 2025 جىلعا دەيىن كىم بار، كىم جوق. اتىراۋ وبلىسى اكىمىنىڭ 3 ورىنباسارى جەمقورلىق فاكتىسىمەن تەرگەلىپ جاتىر. نوعاەۆ مىرزا وتكەن وقيعالاردان كەيىن ماڭعىستاۋ حالقىنا بيلىك جۇرگىزەمىن دەپ وتىر ما؟ ونىڭ دا ءبىر ورىنباسارى كەشە ۇستالدى. عالي ەسقاليەۆ دەگەن ادامدى ەندى كورىپ تۇرمىن. ونداي دا اكىم بار ما؟ مۇلدەم جابىق، جۇمباق ادام.

بيلىك وكىلدەرىنىڭ اراسىندا اۋىل حالقىن مادەنيەتسىز، ءبىلىمسىز، قىسقاسى توپاس كورەتىندەر بار. بىراق كەشەگى قاڭتار كوتەرىلىسىندە الەۋمەتتىڭ اكىمدەرمەن قالاي سويلەسكەنىن كوردىڭىزدەر. ءسوز ساپتاۋى بولەك نەبىر مىقتى ازاماتتار بار ەكەن. ەل ىشىندەگى پروبلەمالاردى ەلدىڭ وزىنەن ارتىق ەشكىم بىلمەيدى. قايتا سول اكىمدەر حالىقپەن ءتىل تابىسا الماي تۇر. سەبەبى بۇعان دەيىن ەلمەن تەڭ دارەجەدە تۇرىپ سويلەسپەگەن. جەرگىلىكتى جۇرتتى تانىمايدى. اۋىل ارالاسا، تىعىلىپ كىرەدى، تىعىلىپ شىعىپ كەتەدى. ءتىپتى حالىققا ەسەپ بەرۋ جيىندارىندا تاكاپپار اكىمدەر تورگە شىعىپ وتىرىپ الادى.

ۇكىمەتتەگىلەر دە، اكىمدەر دە بۇگىن بار، ەرتەڭ جوق. وڭىرلەردىڭ دامۋ جوسپارىن ەڭ ءبىرىنشى كەزەكتە تۇرعىندار ماقۇلداۋى كەرەك. ول ءۇشىن ەلدىڭ ىشىنەن جۇمىس توبى قۇرىلادى. ەكى جاقتى مامىلەگە كەلگەسىن بارىپ قۇجات ۇكىمەتكە جولدانباي ما؟ وسىنداي ءبىر جۇيە كەرەك سياقتى. ايتپەسە 4 وبلىستىڭ دامۋ جوسپارىن ءبىر ساعاتتا قابىلداپ جىبەرۋ دەگەن... قايدا اسىعامىز؟ مىناۋ ءماميننىڭ جۇمىس ستيلىنە ۇقساپ كەتتى. حالىققا سلايد ەمەس، ناقتى ناتيجە كەرەك. پرەزيدەنت تە سونى تاپسىردى ەمەس پە؟!

ازامات بيتاننىڭ جازباسى

Abai.kz