قاڭتارداعى قايعىلى وقيعامەن اينالىساتىن تاعى ءبىر قوعامدىق كوميسسيا قۇرىلدى. ونى قورعاۋشى ايمان وماروۆا باسقارادى، دەپ حابارلادى پرەزيدەنتىنىڭ ساياسي ماسەلەلەر جونىندەگى كومەكشىسى ەرلان قارين الەۋمەتتىك جەلىدەگى پاراقشاسىندا.

«بۇگىن مەن بەلگىلى قۇقىق قورعاۋشى، زاڭگەر ايمان وماروۆامەن كەزدەستىم. جاقىندا ايمان وماروۆا قاڭتار وقيعاسىن قوعامدىق زەرتتەۋ كوميسسياسىن قۇرۋ تۋرالى باستاما كوتەردى. ول قاجەتتى ماتەريالداردى جيناقتاپ، تارتىپسىزدىك كەزىندە زارداپ شەككەن الماتىلىقتاردىڭ پىكىرىن زەرتتەپ، قۇقىق قورعاۋ ورگاندارىنا ءتۇرلى وتىنىشتەر جولداماق. كوميسسيا قۇرامىنا بەلگىلى قۇقىق قورعاۋشىلار، قىلمىستىق ءىس جۇرگىزۋ قۇقىعى بويىنشا ماماندانعان زاڭگەرلەر كىردى. سونىمەن قاتار، ايمان وماروۆانىڭ ءوزى زورلىق-زومبىلىق ەكسترەميزم جانە تەرروريزم ماسەلەلەرى بويىنشا ءبىزدىڭ ەلدە عانا ەمەس، سونىمەن قاتار شەتەلدە دە تانىمال مامان. ءبىز بايلانىستا بولامىز دەپ كەلىستىك»، - دەپ جازدى  ەرلان قارين.

ونىڭ ايتۋىنشا، مەملەكەتتىك ورگاندار مەن قۇقىق قورعاۋ ورگاندارى دا وقيعالارعا وبەكتيۆتى جانە اشىق باعا بەرۋگە مۇددەلى.

«سوندىقتان ءارتۇرلى قۇقىق قورعاۋ توپتارىمەن جۇيەلى جۇمىس جۇرگىزىلۋدە. ماسەلەن، قۇقىق قورعاۋشى جەمىس تۇرماعامبەتوۆا ادام قۇقىقتارى جونىندەگى ۋاكىلى ەلۆيرا ازىموۆامەن بىرگە قازىر وڭىرلەرگە (الماتى، شىمكەنت، اتىراۋ وبلىسى) ءىسساپارلار جاساپ، قاماۋداعىلاردىڭ جاعدايى مەن قاماۋعا الىنۋىن زەرتتەپ، ارىز-شاعىمدارى مەن وتىنىشتەرىن قاراۋدا. ءبىز دە ولارمەن ۇنەمى بايلانىستا بولىپ، وتىنىشتەرىنە جەدەل جاۋاپ بەرەمىز. جاقىندا مەن بەلگىلى زاڭگەر ابزال قۇسپانمەن دە كەزدەستىم، ول دا تاياۋداعى قاڭتار وقيعاسىنا بايلانىستى جەكەلەگەن تۇلعالاردى قىلمىستىق جاۋاپكەرشىلىككە تارتۋدىڭ ءمان-جايىن زەرتتەۋ ءۇشىن قوعامدىق كوميسسيا قۇردى»، - دەپ تۇيىندەدى قارين.

Abai.kz