الماتىدا وتكەن ءباسپاسوز جيىنى بارىسىندا امانات قوعامدىق كوميسسياسىنىڭ توراعاسى، ادۆوكات ابزال قۇسپان ۇستالعاندار اراسىندا وزگە ەلدىڭ ازاماتتارى بار ما دەگەن سۇراققا جاۋاپ بەردى.

الماتىداعى وقيعا بويىنشا ۇستالعاندار اراسىندا وزگە ەلدىڭ ازاماتتارى كەزدەسكەن جوق، بىراق شەتەلدەن كەلگەن قانداستارىمىز بار. اسىرەسە قىتاي ەلىنەن كوشىپ كەلگەن قانداستارىمىز كوپتەپ كەزدەستى. ولاردىڭ ءبىر-ەكەۋى قالعان بولۋ كەرەك، ءبىرازىن ءبىز شىعاردىق. ونىڭ ىشىندە ەلگە تانىمال ءداستۇرلى ءانشى سەيىت ساۋاتايدى اتاپ وتەر ەدىم. بۇگىن تاعى ەكى قانداسىمىز قاماۋدان شىقتى، – دەدى ابزال قۇسپان.

بۇعان دەيىن ول قاماۋدا ايەلدەر مەن كامەلەتتىك جاسقا تولماعان ازاماتتار وتىرعانىن ايتقان بولاتىن.

ايتا كەتسەك، ءبىر اپتا بۇرىن جۇمىسىن باستاعان امانات كوميسسياسى وسى ارالىقتا 36 ازاماتتى قاماۋدان شىعارعان ەدى. ولاردىڭ باسىم كوپشىلىگى ءتۇرلى دەنە جاراقاتىن العان ازاماتتار.

Abai.kz