وليمپيادا ويىندارى باستالدى. رەسمي اشىلۋ سالتاناتى ەرتەڭ وتپەك. الايدا الەم نازارى بەيجىڭدە ەمەس، ۋكراينا مەن رەسەي شەكاراسىندا. ساراپشىلار رەسەي 2008-جىلدىڭ تاجىريبەسىن قايتالاۋى مۇمكىن دەيدى. 2008 جىلى قىتايدا جازعى وليمپيادا ويىندارى باستالعان كۇنى رەسەي اسكەرى ارانداتۋ ارەكەتتەرىن جاساپ، گرۋزياعا شابۋىل جاساعان بولاتىن. بۇل الەمدىك قاۋىمداستىق نازارى وليمپيادا دا بولعان ساتتە جاسالعان قۋلىق دەپ باعالادى ماماندار. رەسەي ءدال وسى ارەكەتتى اراعا 14 جىل سالىپ قايتالاۋى مۇمكىن دەگەن دە بولجام بار. الايدا قىتاي تاراپى وليمپيادا ويىندارى ساتىندە رەسەيگە سوعىس اشپاۋ تۋرالى ءوتىنىش جاساپتى-مىس دەگەن دە اقپاراتتار ايتىلۋدا. 

كانادا ۋكراينانى ناقتى قولدايتىنىن جەتكىزدى. كانادا ۋكراينا باتىسىندا ورنالاستىرىلعان جاتتىقتىرۋشىلارىن ۋكراينانىڭ شىعىسىنا اتتاندىردى.  جاتتىقتىرۋشىلار اراسىندا مەرگەندەردى ۇيرەتۋ توبى بار. ولار ۋكراينا جاساقتارىن ۇيرەتۋ ۇستىندە.

دۇيسەنبى كۇنى كانادانىڭ ۇلتتىق قورعانىس ءمينيسترى انيتا اناند الداعى تاڭدا ۋكرايناعا تاعى دا 60 جاتتىقتىرۋشى جىبەرەتىنىن ايتتى. بۇل Unifier وپەراتسياسىنىڭ اياسىندا ىسكە اسپاق. كانادا تەك قانا جاتتىقتىرۋشى جىبەرۋمەن شەكتەلمەي، قورعانىش كوستيۋمدەرىن، ءدۇربى، اتىس قارۋلارى مەن لازەرلىك ولشەۋ قۇرالدارىن دا بەرەتىن بولدى. كومەك كەلەر اپتادا كيەۆكە جەتكىزىلمەك.

كانادا  2015 جىلدان باستاپ Unifier وپەراتسياسىنىڭ اياسىندا ۋكراينانىڭ 30 مىڭ جاساعىن دايىنداعان. سونىمەن قاتار ۇلتتىق گۆارديانىڭ 2 مىڭ ارنايى جاساعى دايىندىقتان ءوتتى. كانادا پرەمەرى دجاستين تريۋدو ۋكراينا اسكەرىن ۇيرەتۋشىلەر سانى 400 ادامعا دەيىن ارتۋى مۇمكىن ەكەنىن دە مالىمدەدى. اتالمىش مالىمدەمەلەردى ماسكەۋ "جاۋلاستىق بەلگىسى" دەپ سانايتىنىن دا جاسىرمايدى.

ۇلىبريتانيا دا ۋكرايناعا بارلىق كومەكتى كورسەتەتىنىن ايتتى. ۇلىبريتانيا پرەمەرى بوريس دجونسان وسى اپتادا جاپونياعا رەسمي ساپارمەن بارۋى ءتيىس ەدى، الايدا ول توكيو ساپارىن كەيىنگە قالدىرىپ، كيەۆكە كەلدى. دجونسون پۋتينمەن تەلەفون ارقىلى سويلەسپەي تۇرىپ، الدىمەن زەلەنسكيمەن كەزدەستى. ۇلىبريتانيا پرەمەرى رەسەيدىڭ ارەكەتىن قاتاڭ سىناۋشىلاردىڭ ءبىرى. ول "ورىس اسكەرى ۋكراينا جەرىنە ءبىر قادام جاساعان ساتتە رەسەي ءۇشىن اپاتتى جاعداي باستالىپ، سۇمدىق سانكتسيالار ەنگىزىلەتىنىن" ايتتى. ارينە، لوندون كيەۆكە قارىلاي جانە قارۋ تۇرىندەگى كومەگىن دە ايامايتىنىن جەتكىزدى. قازىردىڭ وزىندە NLAW تانككە قارسى قۇرىلعىلارى جەتكىزىلۋدە.

پولشا دا كيەۆ ءۇشىن كۇيىپ-پىسەتىنىن ايتتى. ناقتى ايتقاندا كيەۆكە تىكۇشاقتى قۇلاتۋعا قابىلەتتى قۇرىلعىلار جەتكىزەتىنىن مالىمدەدى. بۇل رەسەي ءۇشىن ەڭ قاۋىپتى، سەبەبى رەسەي اسكەرى شابۋىل جاساسا، ارنايى كۇشتەرىن تىكۇشاقتار ارقىلى ۋكراينا اۋماعىنا جەتكىزۋى مۇمكىن دەگەن بولجامدار ايتىلۋدا.

اقش باسشىسى بايدەن ەۋروپاعا 8 مىڭ جاساق جىبەرۋگە بۇيرىق بەردى. ولار شىعىس ەۋروپا ەلدەرىنە ورنالاستىرىلادى. سونىمەن قاتار ۆاشينگتون بالتىق ەلدەرىنە دە ۋكرايناعا قارۋ بەرۋگە رۇقساتىن بەردى. قازىر اقش پەن ەو ەلدەرى جاڭا گاز كوزدەرىن ىزدەستىرۋ ۇستىندە.

رەسەي ناتو ەلدەرى ۋكرايناعا ءدال وسىنداي دەڭگەيدە كومەك كورسەتەدى دەپ كۇتپەسە كەرەك. قازىرگى ۋاقىتتا رەسەي تەلەارنالارىنىڭ باعىتى "باسىپ كىرەمىزدەن سانكتسيا اسەرى" دەگەن تاقىرىپقا اۋا باستادى. بۇل ىشكى اۋديتورياعا ارنالعانى انىق. دەمەك پۋتين قازىردىڭ وزىندە ەكى اي بۇرىنعىداي سەنىمدى ەمەس جانە ونىڭ قاۋىپسىزدىك كەپىلدىگى تۋرالى ۋلتيماتۋمى ءوزى ويلاعانداي ىسكە اسپادى.

اسحات قاسەنعالي

Abai.kz