ء"بىز قارا تەڭىز ايماعىندا قىسىمنىڭ بارىنشا ازايعانىن قالايمىز", - دەدى ول.

ەردوعاننىڭ رەسەي مەن ۋكراينا اراسىندا ارااعايىندىق رولىندە بولۋىن كيەۆ وڭ قابىلدادى. بۇل جونىندە ءباسپاسوز ءماسليحاتى كەزىندە ۋكراينا ليدەرى ۆلاديمير زەلەنسكي مالىمدەدى.

جوعارىداعى ۇسىنىستى ەردوعان ەكى اپتا بۇرىن دا ايتقان. سول كەزدە كرەملدىڭ رەسمي وكىلى دميتري پەسكوۆ ەگەر تۇرىك ارىپتەسىمىز كيەۆتى مينسك كەلىسىمىن ورىنداتۋعا يتەرمەلەسە، ماسكەۋ بۇل ۇسىنىستى قولدايدى دەپ مالىمدەگەن.

3 اقپاندا ەردوعاننىڭ كيەۆكە ساپارى بارىسىندا ۋكراينا مەن تۇركيا ەركىن ساۋدا جونىندەگى كەلىسىمگە قول قويدى. كەلىسىمنىڭ ەڭ ماڭىزدى تۇسى – تۇركيانىڭ 10 137 تاۋارىنىڭ باج سالىعىن نولگە اينالدىرۋ، بۇل جالپى تاۋاردىڭ 95 پايىزى. بۇدان بولەك 1348 تاۋارعا تاريفتىك كۆوتا ەنگىزىلەدى نەمەسە باج سالىعى تومەندەتىلەدى.

"كەلىسىمگە دەيىن ءوزارا تاۋار اينالىمى رەكوردتىق كورسەتكىشكە جەتىپ، 7 ملرد دوللارعا ءوستى. بۇل ەكى ەلدىڭ تاۋار اينالىمىن 10 ملرد دوللارعا جەتكىزۋ دەگەن ماقساتقا بارا جاتقان جول. بۇل ءبىز كۇتكەننەن دە تەز ءجۇرىپ جاتىر", – دەدى زەلەنسكي.

سونىمەن ۋكراينا مەن تۇركيا ۇشقىشسىز ۇشاق شىعارۋدى بىرلەسىپ ءوندىرۋ جونىندە كەلىسىمگە كەلدى.

سوڭعى ۋاقىتتا تۇركيا مەن ۋكراينا قورعانىس سالاسىندا ىنتىماقتاستىقتى كەڭەيتتى. 2019 جىلدان بەرى كيەۆ انكارادان "بايراكتار" درونىن ساتىپ الادى. سونىمەن بىرگە تۇرىكتىڭ اسكەري كەمەسىن ساتىپ الۋ جونىندە كەلىسىمگە قول قويىلعان.

Abai.kz