كۇنى كەشە عانا ءماجىلىستىڭ جالپى وتىرىسىندا دەپۋتات ەدىل جاڭبىرشين «جاڭا قازاقستان» اتتى دەپۋتاتتىق توپ قۇرىلاتىنىن جاريا ەتتى.

قاڭتار وقيعاسى ءبارىمىز ءۇشىن ۇلكەن ساباق بولۋى كەرەك ەكەنىن اتاپ ءوتىپ، ونىڭ العىشارتتارى – قوعام مەن بيلىكتىڭ شىنايى تازارۋى، اقيقاتتىڭ اشىق ايتىلۋى، قاتەلىكتەردىڭ مويىندالۋى، مەملەكەتتىك اپپارات پەن قۇرىلىمداردىڭ وليگوپوليا وكىلدەرى مەن جەمقورلاردان تازارتىلۋى بولىپ وتىر دەگەندى ايتتى.

سونىمەن، بۇل قۇرىلعان «جاڭا قازاقستان» قانداي توپ؟ ولاردىڭ ماقسات-مىندەتتەرى نە؟ بۇل سۇراقتارعا بۇگىن ءماجىلىس دەپۋتاتى ايدوس سارىم جاۋاپ بەرىپتى.

ايدوس سارىم:

- جاڭا قازاقستان» دەپۋتاتتىق توبىنىڭ قۇرىلۋى سەبەبى، ونىڭ شارتى تۋرالى ايتۋعا رۇقسات ەتىڭىزدەر. وزدەرىڭىز بىلەسىزدەر، كەشە ءماجىلىستىڭ جالپى وتىرىسىندا ارىپتەسىمىز ەدىل جاڭبىرشين مالىمدەمەمىزدى جاريالاعان بولاتىن. قازىر ول كىسى ۇكىمەتتە جاڭاوزەن ماسەلەسى بويىنشا كەلىسسوز جۇرگىزىپ جاتىر. ءبىزدىڭ باستى ماقساتىمىز - قاڭتار تراگەدياسىنان كەيىنگى ەلىمىزدەگى شىنايى رەفورمالاردى قولداۋ.

بىرىنشىدەن - پرەزيدەنت باستاعان ەلدى جاڭعىرتاتىن باستامالاردى قولداپ، ولاردى سابوتاجعا، توقتاۋعا، سوڭىنا ىسىرۋعا جول بەرمەۋ.

ەكىنشىدەن كەز كەلگەن ۇلكەن ساياسي رەفورمالار زاڭ شىعارۋشى جانە وكىلەتتى ورگاننان باستالۋى كەرەك. ءبىزدىڭ تۇپكىلىكتى ماقساتىمىز - ءماجىلىستىڭ جۇمىسىن جاڭا جولعا، جاڭا ارناعا بۇرۋ. ونىڭ ىشىندە ءماجىلىستىڭ اشىقتىعى، بەلسەندى اڭگىمە كوتەرىپ، ونى قوزعاۋى دا بار. بۇل ۇلكەن ماسەلەنىڭ ءبىرى.

بۇل ءوزىمىزدىڭ قولىمىزدا تۇرعان نارسە. ەلىمىزدە جۇرگىزىپ جاتقان بيۋدجەتتىك باعدارلامالارىنىڭ تيىمدىلىگىن ارتتىرۋ ماقساتىندا ۇكىمەتپەن جانە باسقا دا مەملەكەتتىك ورگاندارمەن قويان-قولتىق جۇمىس ىستەپ، تالاپتاردى كۇشەيتەمىز. جاقىندا پرەيدەنت ناۋرىز ايىندا ۇلكەن ساياسي رەفورمالاردىڭ جاريالاناتىندىعىن ايتتى. سوعان بەلسەنە اتسالىسامىز. ەلدەگى رەفورمالاردىڭ دۇرىس جۇرگىزىلۋىن، ونىڭ شىن مانىندە قوعامنىڭ، حالىقتىڭ تالابىنان شىعۋىن نازاردا ۇستاپ، ونىڭ بەلسەندى سۋبەكتىسىنە اينالامىز. ۇشىنشىدەن، ايماقتاعى وكىلەتتى ورگانداردىڭ جۇمىسىن جانداندىرۋ قاجەت. قوعامدىق كەڭەستەرگە، ماسليحاتتارعا وزگەرىستەر كەرەك. ولارعا جاقسى ۇلگى كورسەتۋ كەرەك دەپ ويلايمىز. وسى تۇرعىدا دا ەڭبەك ەتەمىز.

Abai.kz