ۆەتنام پرەزيدەنتى چىونگ تان شانگ قازاقستانعا مەملەكەتتىك ساپارمەن كەلگەندە، ءبىر توپ قازاقستاندىق جۋرناليست ۆەتنامنىڭ وڭتۇستىگىندەگى حوشيمين قالاسىنا اتتاندى. ەكى ەلدىڭ پرەزيدەنتتەرى ديپلوماتيالىق قارىم-قاتىناستى جاقسارتۋ، ەكونوميكالىق بايلانىستاردى نىعايتۋ، كەدەندىك وداق اياسى بويىنشا ارىپتەستىك ورناتۋ تۋرالى كەلىسسوزدەر جۇرگىزىپ جاتقاندا، قازاق جۋرناليستەرى ۆەتنامنىڭ وڭتۇستىگىندەگى ءىرى قالادا وتكىزىلگەن حالىقارالىق تۋريزم كورمەسىنىڭ (ITE 2012) جۇمىسىنا قاتىستى.تۋريزم سالاسىندا ۆەتنام ەلىنىڭ كەلەشەگى زور ەكەنى كوزگە ۇرادى. وسىدان بەس جىل بۇرىن بۇل ەلدە سىرتتان كەلگەن قوناقتارعا قىزمەت كورسەتۋ ساپاسى الدەقايدا تومەن بولعان. ال قازىر ەلدىڭ وڭتۇستىگىندە شەتەلدىك تۋريستەردى قۇراق ۇشىپ قارسى الار بەس جۇلدىزدى قوناق ۇيلەر، جوعارعى ساناتتاعى مەيرامحانالار كوپتەپ سالىنعان، ءالى دە سالىنىپ جاتىر.

ۆەتنام پرەزيدەنتى چىونگ تان شانگ قازاقستانعا مەملەكەتتىك ساپارمەن كەلگەندە، ءبىر توپ قازاقستاندىق جۋرناليست ۆەتنامنىڭ وڭتۇستىگىندەگى حوشيمين قالاسىنا اتتاندى. ەكى ەلدىڭ پرەزيدەنتتەرى ديپلوماتيالىق قارىم-قاتىناستى جاقسارتۋ، ەكونوميكالىق بايلانىستاردى نىعايتۋ، كەدەندىك وداق اياسى بويىنشا ارىپتەستىك ورناتۋ تۋرالى كەلىسسوزدەر جۇرگىزىپ جاتقاندا، قازاق جۋرناليستەرى ۆەتنامنىڭ وڭتۇستىگىندەگى ءىرى قالادا وتكىزىلگەن حالىقارالىق تۋريزم كورمەسىنىڭ (ITE 2012) جۇمىسىنا قاتىستى.تۋريزم سالاسىندا ۆەتنام ەلىنىڭ كەلەشەگى زور ەكەنى كوزگە ۇرادى. وسىدان بەس جىل بۇرىن بۇل ەلدە سىرتتان كەلگەن قوناقتارعا قىزمەت كورسەتۋ ساپاسى الدەقايدا تومەن بولعان. ال قازىر ەلدىڭ وڭتۇستىگىندە شەتەلدىك تۋريستەردى قۇراق ۇشىپ قارسى الار بەس جۇلدىزدى قوناق ۇيلەر، جوعارعى ساناتتاعى مەيرامحانالار كوپتەپ سالىنعان، ءالى دە سالىنىپ جاتىر.

رەسمي دەرەكتەرگە جۇگىنسەك، بيىلعى جىلدىڭ العاشقى جەتى ايىندا ۆەتنامعا شەتەلدىك 3,83 ميلليون تۋريست ات باسىن بۇرعان ەكەن. بۇل دەگەنىڭىز بىلتىرعى جىلدىڭ وسى ارالىقتاعى كورسەتكىشىمەن سالىستىرعاندا 10,8 پايىزعا ارتىق. اسىرەسە قىتاي، جاپونيا، وڭتۇستىك كورەيا، اقش، ۇلىبريتانيا، اۆستراليا، فرانتسيا ەلدەرىنەن كەلەتىن تۋريستەر سانى باسىم. ونىڭ ىشىندە جاپونيادان كەلەتىن تۋريستەر سانى 21,4 پايىز، ال وڭتۇستىك كورەيادان كەلگەن ساياحاتشىلار سانى 37,9 پايىزدى قۇرايدى. سوڭعى كەزدە مالايزيا مەن تايلاندتان كەلگەن قوناقتار سانى دا ارتا تۇسكەن. 
قىركۇيەكتىڭ 13-15 ارالىعىندا حوشيمين قالاسىندا 8-ءشى حالىقارالىق تۋريزم كورمەسىنە 30 مەملەكەتتەن كەلگەن 300-دەن استام كومپانيا وكىلدەرى قاتىستى. كەيبىر دەرەكتەرگە جۇگىنسەك، بۇل كورمەنى تاماشالاۋعا 15 000-نان استام شەتەلدىك جانە جەرگىلىكتى قوناقتار كەلەدى دەپ جوسپارلانعان ەكەن. 
ۆەتنامنىڭ مادەنيەت، سپورت جانە تۋريزم مينيسترلىگىنىڭ مۇرىندىق بولۋىمەن، تۋريزم جونىندەگى ۆەتنام ۇلتتىق اكىمشىلىگىنىڭ قولداۋىمەن حالىقارالىق تۋرزيم كورمەسى 2005 جىلدان بەرى وتكىزىلىپ كەلەدى. 2009 جىلى وتكىزىلگەن كورمەدە «ءۇش ەل، ءبىر باعىت» (كامبودجا، لاوس، ۆەتنام) ۇرانى ۇسىنىلعان بولاتىن. ال بىلتىرعى كورمەدە ۆەتنام، لاوس، كامبودجا مەملەكەتتەرى قاتارىنا ميانما قوسىلىپ، «ءتورت مەملەكەت، ءبىر باعىت» دەگەن باعدارلاما ازىرلەندى. وسىعان وراي، CLMV (Cambodia, Laos, Myanmar, Vietnam) دەگەن اببرەۆياترۋاسى قابىلداندى. باسقاشا ايتقاندا، وڭتۇستىك-شىعىس ازيانى ارالاۋعا نيەتتى تۋريستەرگە ءبىر ساپاردا ءتورت ەلدى تۇگەل ارالاۋعا جاعداي جاسالماق. قازىرگى كەزدە ءتورت مەملەكەت اراسىندا تۋريستىك ۆيزا بەرۋدى وڭايلاتۋ ماسەلەسى تالقىلانۋ ۇستىندە. 
بۇل ءتورت مەملەكەتتىڭ تۋريزم جونىندەگى مينيسترلىك باسشىلارى حوشيمين قالاسىندا بىرلەسكەن وتىرىس وتكىزدى. ولار الداعى ەكى جىلدا اتقارىلار شارالار جونىندە اقىلداسىپ، ارىپتەستىك جونىندەگى كەلىسىم قۇجاتتارىنا قول قويدى. 
حالىقارالىق كورمە جۇمىسىنا قازاق­ستان اتىنان «ەير استانا» ۇلتتىق اۋە كومپانياسى قاتىستى. وسى جىلدىڭ سوڭىنا دەيىن قازاقستان مەن ۆەتنام اراسىندا تىكەلەي اۋە جەلىسى اشىلادى دەپ جوسپارلانىپ وتىر. «ەير استانا» كومپانياسىنىڭ قيىر شىعىس پەن اۆستراليا بويىنشا ايماقتىق ديرەكتورى دانۆانتري گۋنەتيللەكتىڭ ايتۋىنشا، حوشيمين قالاسىندا بۇگىندە 2500 تۋريستىك اگەنتتىك بار، ولاردىڭ ارقايسىسى قازاقستانعا ساياحات قىزمەتىن ۇسىنا الادى. بۇگىنگى تاڭدا 80-گە تارتا اگەنتتىك قازاقستانعا ۆەتنامنان كەشەندى تۋر پاكەتىن ساتۋدا. جالپى، ەكى ەل اراسىنداعى 4500 شاقىرىمنان اساتىن جولدى 5,5-6 ساعاتتا ۇشىپ وتۋگە بولادى. بارىپ-قايتۋ بيلەتىنىڭ قۇنى شامامەن العاندا 500 دوللاردى قۇراماق. 
قازاقستان ۆەتنامدى وڭتۇستىك-شىعىس ازياداعى ماڭىزدى ارىپتەس سانايدى. ەكى ەل اراسىنداعى ديپلوماتيالىق قارىم-قاتىناس 1992 جىلدان بەرى ورناعان. قازاقستان پرەزيدەنتى نۇرسۇلتان نازارباەۆ بىلتىرعى جىلدىڭ قاراشا ايىندا ۆەتنام استاناسى حانويعا ىسساپارمەن بارعان بولاتىن. 
ۆەتنام ەلشىلىگى استانادا 2008 جىل اشىلدى، ال قازاقستاننىڭ ۆەتنامداعى ەلشىلىگىن اشۋ ماسەلەلەسى ۆەتنام پرەزيدەنتىنىڭ قازاقستانعا ساپارى كەزىندە تالقىلاندى. قازاقستان ەلشىلىگى 2013 جىلى اشىلادى دەپ جوسپارلانىپ وتىر. بۇدان بولەك، حوشيمين مەن الماتى اراسىندا ءوزارا تۇسىنىستىك جونىندە مەموراندۋم بار. 
2011 جىلى ەكى ەل اراسىنداعى تاۋار اينالىمى 59 ميلليون دوللاردان اسقان. ونىڭ 7,3 ميليونى ەكسپورت بولسا، 51,8 ميليلونى - يمپورت. ال بيىلعى جىلدىڭ العاشقى جارتى جىلدىعىندا 44,4 ملن. دوللاردى قۇرادى. قازاقستان ۆەتنامعا اسبەست، تەمىر جانە قۇرىش ونىمدەرىن، ءتۇرلى قۇرال-جابدىقتار تاسىمالداسا، ال ۆەتنامدىقتار بىزگە ءشاي، ءدارى-دارمەك، قاعازدان، كارتون مەن شىنىدان جاسالعان بۇيىمداردى، اياق كيىم، كومپيۋتەرلەر ت.ب. زاتتاردى جەتكىزەدى. 
ونىڭ ۇستىنە، ۆەتنام قازاقستان اوسشك اياسىندا ارىپتەس، ەندى كەدەندىك وداق پەن ۆەتنام اراسىندا ەركىن ساۋدا ايماعىن قۇرۋ تۋرالى كەلىسىمگە قول قويىلدى. 
قازاقستاندىق تۋريستەر ءۇشىن ۆەتنام ءالى اسا تانىمال ەمەس. ەكى ەل اراسىندا بۇعان دەيىن تىكەلەي اۋە جەلىسىنىڭ بولماۋى بۇعان ەداۋىر كەدەرگى كەلتىرەدى. الايدا، ۆەتنامدىق تۋريستىك كومپانيا وكىلدەرىنىڭ ايتۋىنشا، سوڭعى جىلدارى رەسەيدەن، قازاقستان مەن ورتا ازيادان كەلەتىن تۋريستەر قاتارى ارتا تۇسكەن. 
ەكەۋى دە جىلدام دامۋشى ەلدەر سانالاتىن قازاقستان مەن ۆەتنامنىڭ ءبىر-بىرىنەن الارى دا، بىرىنەن-ءبىرى ۇيرەنەرى دە كوپ. جوعارعى دەڭگەيدەگى كەزدەسۋلەر مەن حالىقارالىق شارالار 4500 شاقىرىمنان اساتىن قاشىقتىقتى قىسقارتۋعا ىقپال ەتەدى.

الماتى - كۋالا لۋمپۋر - حوشيمين - بانكگوك - الماتى

گۇلبيعاش وماروۆا

"تۇركىستان" گازەتى