قاڭتارداعى تارتىپسىزدىكتەردەن كەيىن ۇستالعاندارعا قاتىستى ءولىم، ازاپتاۋ جانە قىزمەتتىك وكىلەتتىگىن اسىرا پايدالانۋ دەرەكتەرى بويىنشا 133 قىلمىستىق ءىس قوزعالدى. بۇل تۋرالى باس پروكۋروردىڭ ورىنباسارى ەرلىك كەنەنباەۆ ايتتى. 

كەنەباەۆ زاڭسىز ارەكەتتەر، سونىڭ ىشىندە ازاپتاۋ نەگىزىنەن تەرگەۋدىڭ باستاپقى كەزەڭىندە بولاتىنىن ايتتى. ونىڭ ايتۋىنشا، ۇستالعاندار پوليتسيا بولىمشەسىنە جەتكىزىلىپ، تەرگەۋشى نەمەسە جەدەل ۋاكىلمەن جالعىز قالادى. كوپ زاڭسىزدىق وسى كەزدە تىركەلەدى.

"ۇستالعانداردىڭ كوبى ءوز قۇقىعىن بىلمەيدى، قورعاۋشىلارى دا جوق. كوپ جاعدايدا پوليتسەيلەر وسىنى پايدالانادى. ونىڭ سەبەبى ناقتى رەتتەلگەن جۇمىس ءتارتىبىنىڭ جوقتىعىندا. قاڭتار وقيعاسى سونىڭ ايقىن دالەلى", - دەدى ول ماجىلىستە سويلەگەن سوزىندە.

باس پروكۋروردىڭ ورىنباسارى پروكۋراتۋرا ورگاندارىنا قاڭتار وقيعاسىنا بايلانىستى قۇقىق قورعاۋ ورگاندارى قىزمەتكەرلەرىنىڭ ازاپتاۋى جانە قۇقىعىن بۇزعانى تۋرالى 250 ارىز تۇسكەنىن ايتتى.

"ماسەلەن، بيىل 12 قاڭتاردا الماتى قالاسىنىڭ پروكۋراتۋراسى زاڭسىز قاماۋعا الىنعان 24 قالا تۇرعىنىن بوساتتى. بۇل فاكت بويىنشا ارنايى پروكۋرور تەكسەرىس جۇرگىزىپ جاتىر. سونداي-اق ادام ءولىمى، ازاپتاۋ، جابىرلەۋ فاكتىلەرى بويىنشا دا ىستەر تەرگەۋدە. ۇستالعاندارعا قاتىستى 133 قىلمىستىق ءىس تەرگەلىپ جاتىر", - دەدى كەنەباەۆ.

ەرلىك كەنەنباەۆ تەرگەۋدىڭ وبەكتيۆتىلىگى ءۇشىن بارلىق ءىس بويىنشا پروتسەسسۋالدىق پروكۋرورلار تاعايىندالعانىن ايتتى.

Abai.kz