ەنەرگەتيكا ءمينيسترى بولات اقشولاقوۆ قازاقستاندا اتوم ەلەكتر ستانتسياسىن سالۋدىڭ ارتىقشىلىقتارىن ايتتى. بۇل تۋرالى Tengrinews.kzكە سىلتەمە جاساپ، Abai.kz حابارلايدى. 

"قازاقستاندا اتوم ەنەرگەتيكاسىن دامىتۋ ءۇشىن ارتىقشىلىقتار بار. وعان كۇش-جىگەرىمىز جەتەدى. قازاقستان تابيعي ۋران كولەمى بويىنشا الەمدە ءبىرىنشى ورىن الادى. يادرولىق وتىن كومپونەنتتەرىنەن ءوز ءوندىرىسىمىز بار. ەلىمىزدە ۋراندى يزوتوپتى بايىتۋ جونىندەگى قىزمەتتەرگە قول جەتكىزە الامىز.

بىلتىر ءۇلبى مەتاللۋرگيا زاۋىتىنىڭ بازاسىندا اتوم ەلەكتر ستانتسيالارى ءۇشىن دايىن يادرولىق وتىن شىعاراتىن زاۋىت اشىلدى. ولار بۇگىندە قىتايدا پايدالانىلىپ نەمەسە سالىنىپ جاتىر. سونداي-اق، يادرولىق وتىننىڭ بەلسەندى ءوندىرىسى باستالدى", - دەدى اقشولاقوۆ وكق بريفينگىندە.

ونىڭ ايتۋىنشا، ەلىمىزدە اتوم ونەركاسىبى مەن عىلىم سالاسىندا 24 مىڭعا جۋىق ادام ەڭبەك ەتەدى.

"قازاقستاننىڭ جوعارى وقۋ ورىندارىندا 2010 جىلدان باستاپ يادرولىق جانە تەحنيكالىق فيزيكا باعىتتارى بويىنشا ءۇش مىڭعا جۋىق كادر دايارلاندى. كەيىنگى اپتادا ەكى ەل باسشىسى رەسەيدىڭ الدىڭعى قاتارلى جوعارى وقۋ ورىندارىندا وسى سالاعا كادرلار دايارلاۋ جونىندەگى مەموراندۋمعا قول قويدى", - دەدى مينيستر.

ول رەسەيمەن كەلىسىمشارتقا اەس سالۋ ءۇشىن ەمەس، كادرلاردى وقىتۋ ءۇشىن عانا قول قويىلعانىن ايتتى.

"ەلەكتر ەنەرگياسى سالاسىنداعى الداعى تاپشىلىقتى ەسكەرىپ، الەمدىك ەكولوگيالىق كۇن تارتىبىنە، سونداي-اق، قابىلدانعان باعدارلاماعا - كومىرتەگى بەيتاراپتىعىنا كوشۋ تۋرالى مالىمدەمەگە بايلانىستى كومىر گەنەراتسياسىنا تاۋەلدىلىكتى ازايتۋ قاجەت. سونىمەن قاتار، بۇگىندە وندىرىستىك قۋات تومەندەگەنىن، ەلدەگى اتوم ەنەرگەتيكاسىن دامىتۋدىڭ زور الەۋەتىن ەسكەرىپ، اەس سالۋ نەعۇرلىم دۇرىس شەشىم بولىپ كورىنەدى", - دەپ تولىقتىردى اقشولاقوۆ.

Abai.kz