سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا 2022 جىلدىڭ 17 اقپانىنا جوسپارلانعان سەنات وتىرىسىنىڭ كۇن تارتىبىنە شىعارىلاتىن ماسەلەلەر قارالدى، - دەپ حابارلادى پالاتانىڭ ءباسپاسوز قىزمەتى.

الدا بولاتىن سەنات وتىرىسىندا دەپۋتاتتار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا (ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن قالىپتاستىرۋ بولىگىنە) وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن تالقىلايدى.

بۇل حاتتاما وداققا مۇشە ەلدەردىڭ ەنەرگەتيكالىق قاۋىپسىزدىگىن ارتتىرۋعا جانە ەۋرازيالىق ەكونوميكالىق وداقتا ادال باسەكەلەستىكتى قامتاماسىز ەتۋگە مۇمكىندىك بەرەتىن قۇقىقتىق كەڭىستىك قالىپتاستىرۋعا ارنالعان.  سونداي-اق پالاتا وتىرىسىنىڭ كۇن تارتىبىنە «قازاقستان رەسپۋبليكاسى مەن رەسەي فەدەراتسياسى اراسىنداعى اسكەري ىنتىماقتاستىق تۋرالى شارتتى راتيفيكاتسيالاۋ تۋرالى» زاڭ جوباسى شىعارىلدى.

اتالعان شارت قازاقستان مەن رەسەيدىڭ اسكەري سالاسىنداعى ىنتىماقتاستىقتى دامىتۋعا ارنالعان. ياعني، مەملەكەتتەردىڭ قاۋىپسىزدىگىن قامتاماسىز ەتۋدە اسكەرلەر قولدانۋدى جوسپارلاۋ، وڭىرلىك سىن-تەگەۋرىندەر مەن قاۋىپ-قاتەرلەرگە قارسى ءىس-قيمىل، جاۋىنگەرلىك دايىندىق، اسكەري سالاداعى ءبىلىم مەن عىلىم، بىتىمگەرشىلىك قىزمەت سالالارىندا ىنتىماقتاستىقتى دامىتۋدى قامتيدى.

Abai.kz