قازاقستاندىقتار شەتەلدەن قازاقستانعا ورالاتىن كەزدە ۆاكتسينا العانىنا قاراماستان پتر-سىناما تاپسىرۋعا مىندەتتەلدى. ءماجىلىس دەپۋتاتى عاني حامزين بۇل ەل كونستيتۋتسياسىن بۇزۋ ەكەنىن ايتىپ، بۇل قاۋلىنى جويۋدى ۇسىندى. بۇل تۋرالى Tengrinews.kzكە سىلتەمە جاساپ،  حابارلايدى. 

عاني حامزين قازاقستان كونستيتۋتسياسىنىڭ 21-بابى 2-تارماعىندا كەلتىرىلگەن "اركىمنىڭ رەسپۋبليكادان تىس جەرلەرگە شىعۋعا قۇقىعى بار. رەسپۋبليكا ازاماتتارىنىڭ رەسپۋبليكاعا ەركىن ورالۋعا قۇقىعى بار" دەگەن جولداردى مىسالعا الدى.

"ەلىمىزدىڭ نەگىزگى زاڭى ءاربىر ازاماتتىڭ شەتەلدەن قازاقستانعا ەشبىر قيىندىقسىز ورالۋ قۇقىعىنا كەپىلدىك بەرەدى. دەگەنمەن، كوروناۆيرۋسقا بايلانىستى كەيبىر جاعدايلاردا ازاماتتاردىڭ قۇقىعى مەن مۇددەسىنە قايشى كەلەتىن قۇقىقتىڭ قالىپتاسۋىنا ىقپال ەتتى. شەتەلگە شىعاتىندار پتر-سىناماسىنىڭ تەرىس ناتيجەسىن كورسەتەتىن انىقتاماسىز ەلگە ورالا المايدى", - دەپ ءتۇسىندىردى دەپۋتات.

ونىڭ ايتۋىنشا، بۇل قيىندىقتار باس مەملەكەتتىك سانيتاريا دارىگەرىنىڭ 2022 جىلعى 13 قاڭتارداعى №3 قاۋلىسىنان كەيىن پايدا بولعان. وسى قاۋلىعا سايكەس، قازاقستان رەسپۋبليكاسىنا كىرەتىن ادامدار مەملەكەتتىك شەكارانى كەسىپ وتۋگە دەيىن كەمىندە 72 ساعات بۇرىن COVID-19 سىناماسىنىڭ تەرىس ناتيجەسى كورسەتىلگەن پتر-تالداۋىن تاپسىرۋعا مىندەتتى.

"اۋەكومپانيا باسشىلارىنا ۆاكتسينانىڭ تولىق كۋرسىنىڭ بار-جوعىنا قاراماستان انىقتامانى ۇسىنباعان جولاۋشىلاردى بورتقا جىبەرمەۋ ۇيعارىلادى. ەگەر قازاقستان ازاماتتارىنىڭ سالدىرعان ۆاكتسينالارى ەلگە كىرۋگە جارامسىز بولسا، نەگە سالعىزدى؟" - دەدى حامزين.

ونىڭ ايتۋىنشا، بۇل ماسەلەدە ادامدار قارجىلىق قيىندىقتارعا تاپ بولادى. قازاقستاندا پتر-سىناماسى 7 مىڭ تەڭگە تۇرادى، ال شەت ەلدەردە قۇنى 20-دان 150 دوللارعا دەيىن. مىسالى، 5 ادامنان تۇراتىن وتباسى 750 دوللار تولەۋگە ءماجبۇر بولادى، ول شامامەن 322 مىڭ تەڭگە. قازاقستاندا بۇعان 35 مىڭ تەڭگە شىعار ەدى.

"ەگەر وتباسىنداعى ادامداردىڭ سىناقتارى تەرىس بولسا، وندا قيىندىق اياقتالادى. ال وڭ ناتيجە بولعان جاعدايدا قازاقستان ازاماتتارى قوناقۇيدە، كارانتين جاعدايىندا تۇرۋعا جانە تاماقتانۋ قىزمەتتەرىن ءوز بەتىنشە تولەۋگە ءماجبۇر بولادى. كارانتين اياقتالعاننان كەيىن ولار قازاقستانعا بيلەتتەردى قايتا الۋعا نەمەسە پايدالانىلماعان بيلەتتەر بويىنشا ايىپپۇل سانكتسيالارىن وتەۋگە ءماجبۇر بولادى. بىزگە قازاقستاندىق وتباسىلار قوناقۇيدە وسىنداي "ەرىكسىز" تۇرۋ اقىسىن تولەپ، وتانىنا ورالۋ ءۇشىن نەسيە رەسىمدەۋگە ءماجبۇر بولعان جاعدايلار بەلگىلى.

بىراق مۇنداي شەكتەۋلەر كونستيتۋتسيانىڭ تىكەلەي بۇزىلۋى، ازاماتتاردىڭ وتانىنا كەدەرگىسىز ورالۋ قۇقىعىنىڭ بۇزىلۋى. مۇنداعى ماسەلە قازاقستاندىقتاردىڭ قوسىمشا شىعىستارىندا دا، بيۋروكراتيالىق كەدەرگىلەردە دە ەمەس. ءىس مەملەكەتتىڭ ءوز كونستيتۋتسياسى مەن ازاماتتىق قۇقىقتارىن قۇرمەتتەۋدە", - دەدى دەپۋتات.

"اقجول" فراكتسياسىنىڭ دەپۋتاتتارى ازاماتتارعا شەتەلگە شىعۋ ماقساتىنا قاراماستان، تۇرعىلىقتى جەرى بويىنشا پتر تاپسىرا وتىرىپ، پتر-انىقتاماسىنسىز ەلگە كىرۋگە جانە باس سانيتاريا دارىگەرىنىڭ 2022 جىلعى 13 قاڭتارداعى №3 قاۋلىسىن جويۋعا رۇقسات بەرۋدى تالاپ ەتتى.

Abai.kz