سارسەنبى كۇنى ماجىلىستە سىبايلاس جەمقورلىقپەن كۇرەس تۋرالى زاڭعا ەنگىزىلەتىن وزگەرىستەر تالقىلانعان. وندا زاڭ جوباسى اۆتورلارىنىڭ ايتۋىنشا، كىرىسى مەن شىعىسى سايكەس كەلمەيتىن شەنەۋنىكتەردى جازاعا تارتۋ، شەنەۋنىكتەرگە شەتەلگە قارجى اكەتۋىنە جول بەرمەۋ ماسەلەلەرى قاراستىرىلعان.

قاڭتار وقيعاسىنان كەيىن ەلدە بۇرىنعى پرەزيدەنت نۇرسۇلتان نازارباەۆ پەن ونىڭ اۋلەتىنىڭ "ۇرلاعان قارجىسىن" ەلگە قايتارۋ ماسەلەسى ءجيى كوتەرىلە باستاعان ەدى. مۇنداي تالاپ 13 اقپان كۇنگى الماتىدا وتكەن ميتينگ كەزىندە دە ايتىلعان.

سارسەنبى كۇنى اگەنتتىك باسشىسى سىبايلاس جەمقورلىقپەن كۇرەس تۋرالى زاڭعا تۇزەتۋلەردىڭ تالقىلانۋىنا قاڭتار وقيعاسى اسەر ەتپەگەنىن، زاڭ جوباسى بىلتىر ماۋسىمنان بەرى پارلامەنتتە جاتقانىن ايتتى.

2 اقپاندا ماجىلىستە سوڭعى 25 جىلدا قازاقستاننان شەتەلدىك وففشورلارعا شامامەن 140-160 ميلليارد اقش دوللارى شىعارىلعانى، بۇل بۇكىل ەلدىڭ جىلدىق ىشكى جالپى ءونىمى مەن ونىڭ سىرتقى قارىزىنا تەڭ ەكەنى ايتىلعان. سول كەزدە نۇرسۇلتان نازارباەۆتىڭ ۇلكەن قىزى داريعا نازارباەۆانىڭ دا اتى جۇرگەن 2016 جىلعى "پاناما ءتىزىمى" تۋرالى زەرتتەۋ ايتىلعان ەدى.

اقپان ايىنىڭ باسىندا ۇلىبريتانيا پارلامەنتىندە "حالىقتى توناپ بايىعان" قازاق وليگارحتارىنا سانكتسيا سالۋ ماسەلەسى تالقىلانعان. "سانكتسيا سالىنۋى ءتيىس" تۇلعالار تىزىمدە كەمىندە 28 ادامنىڭ اتى اتالادى. باسىم بولىگى بۇرىنعى پرەزيدەنت نۇرسۇلتان نازارباەۆتىڭ وتباسى مەن ونىڭ اينالاسىنداعى ادامدار.

Abai.kz