پرەزيدەنت قاسىم-جومارت توقاەۆ ماڭعىستاۋ وبلىسىنىڭ اكىمى نۇرلان نوعاەۆپەن تەلەفون ارقىلى سويلەستى. بۇل تۋرالى مەملەكەت باسشىسىنىڭ ءباسپاسوز حاتشىسى بەرىك ءۋالي مالىمدەدى.

نوعاەۆ وڭىردەگى قوعامدىق-ساياسي جاعداي تۋرالى، سونداي-اق ماڭعىستاۋ وبلىسىن دامىتۋدىڭ كەشەندى جوسپارىندا كوزدەلگەن ءىس-شارالاردىڭ ورىندالۋ بارىسى تۋرالى باياندادى.

"اڭگىمە قورىتىندىسى بويىنشا قاسىم-جومارت توقاەۆ وبلىستىڭ الەۋمەتتىك-ەكونوميكالىق دامۋ پەرسپەكتيۆالارىنا قاتىستى بىرقاتار ناقتى تاپسىرما بەردى", - دەپ جازدى ءباسپاسوز حاتشىسى.

بۇعان دەيىن ماڭعىستاۋ وبلىسىنىڭ اكىمى نۇرلان نوعاەۆ ءوڭىر تۇرعىندارىنا ۇندەۋ جولداعان بولاتىن. ول سوڭعى كۇندەرى جاڭاوزەندەگى بىرنەشە كاسىپورىن جۇمىسىن توقتاتقانىن اتاپ ءوتتى. ونىڭ ايتۋىنشا، قىزمەتكەرلەردىڭ ءبىر بولىگى جالاقىنى كوتەرۋدى جانە باسقا دا ماسەلەلەردى شەشۋدى تالاپ ەتىپ وتىر.

16 اقپانداعى ءباسپاسوز ءماسليحاتىندا وبلىس اكىمى جۇمىس بەرۋشى مەن قىزمەتكەر اراسىنداعى ەڭبەك داۋلارىن شەشۋ ءۇشىن ەڭبەك زاڭناماسى اياسىندا ارنايى الگوريتم بار ەكەنىن ايتقان ەدى.

"ەگەر ەڭبەك داۋلارىنا قاتىستى قانداي دا ءبىر سۇراقتار تۋىنداسا، ازاماتتار بۇل ءۇشىن ەڭبەك زاڭناماسى شەڭبەرىندە ارنايى الگوريتم بار ەكەنىن ءتۇسىنۋى ءتيىس. سايكەسىنشە، قانداي دا ءبىر تالاپتاردى قويۋ ءۇشىن شەرۋگە شىعۋدىڭ قاجەتى جوق. ول ءۇشىن تاتۋلاستىرۋ كوميسسياسى، تورەلىك جانە ەڭبەك ينسپەكتسياسى سياقتى زاڭدى قۇرالدار قاراستىرىلعان", - دەدى نوعاەۆ.

Abai.kz