Qazaqstan تەلەارناسىنا بەرگەن سۇحباتىندا قر پرەزيدەنتى قاسىم-جومارت توقاەۆ ۇقشۇ بىتىمگەرشىلىك كۇشتەرى جانە قازاقستان مەن رەسەيدىڭ ءوزارا قارىم-قاتىناسى تۋرالى سۇراقتارعا دا جاۋاپ بەردى، دەپ حابارلايدى Abai.kz. 

مەملەكەت باسشىسى قازاقستانداعى تارتىپسىزدىكتەردى ۇقشۇ-نىڭ قاتىستىرماي رەتتەۋگە بولمادى ما دەگەن سۇراققا تۇسىنىكتەمە بەرىپ، سونداي-اق بىتىمگەرشىلىك كۇشتەردى تارتۋ تۋرالى ءوز شەشىمىنە وكىنەتىنىن-وكىنبەيتىنىن ايتتى.

“وكىنبەيمىن. بۇل ەشقانداي دا وكىندىرەتىن شەشىم ەمەس. كەرىسىنشە دۇرىس شەشىم بولدى دەپ ويلايمىن. ويتكەنى، قارۋلى قاراقشىلار الماتىنى قيراتىپ، وزگە قالالارعا قاۋىپ ءتوندىردى. وسى قارۋلى كونتينگەنت بولماسا، لاڭكەستەر باسقا دا قالالاردى باسىپ الار ەدى. قارۋلى شايقاستار تالدىقورعاندا، تارازدا، شىمكەنتتە، قىزىلوردادا ورىن الدى. ەلوردادا لاڭكەستەردىڭ دايىندىق جۇمىستارى بايقالدى، ولار، ءتىپتى، اقورداعا شابۋىل جاساۋعا دايىن بولدى. كەيبىر بەدەلدى ساراپشىلار ايتۋىنشا، لاڭكەستەر قازاقستاننىڭ باستى ەكى قالاسىن باسىپ الۋدى جوسپارلاعان. بۇل سيرياداعى ستسەناريگە ۇقساس جوسپار. سول ەلدە لاڭكەستەر داماسك پەن راككانى باسىپ الۋعا ارەكەتتەنگەن ەدى”، – دەدى قاسىم-جومارت توقاەۆ

“ونى اشىق ايتۋ كەرەك. ولار تەك نەگىزگى ستراتەگيالىق نىسانداردى كۇزەتىپ تۇردى. وسى كەزدە ءبىزدىڭ كۇشتىك قۇرىلىمدار ىسكە كىرىسىپ، قارۋلى لاڭكەستەرگە توسقاۋىل قويدى. ارامىزدا تەك تىعىز بايلانىس پەن ۇيلەسىم بولدى. ال ەندى "پۋتينگە قارىز بوپ قالدىق" دەگەنگە كەلسەك، بۇل – بوس اڭگىمە. ونى دوعارۋ كەرەك”، – دەدى مەملەكەت باسشىسى

بىرىنشىدەن، ونىڭ ايتۋىنشا، ۇجىمدىق قاۋىپسىزدىك تۋرالى شارت ۇيىمىنىڭ كونتينگەنتى ۆلاديمير ءپۋتيننىڭ نەمەسە رەسەيدىڭ جەكە اسكەرى ەمەس. بۇل ۇيىمنىڭ اسكەري قۇرامى وعان مۇشە ەلدەردىڭ بارىنە ورتاق. وندا رەسەيدەن بولەك، بەلارۋس، ارمەنيا، تاجىكستان جانە قىرعىزستاننىڭ اسكەري بولىمدەرى بار.

“قازاقستان دا – وسى ۇيىمنىڭ تولىققاندى مۇشەسى ءارى نەگىزىن قالاۋشىسى. سوندىقتان، ءبارى – زاڭدى، قيسىندى»، – دەدى مەملەكەت باسشىسى. «رەسەيگە كەلسەك، بۇل الپاۋىت ەل ءوزىنىڭ گەوساياسي مۇددەسىن دە قورعادى. قازاقستاننىڭ تۇراقتىلىعى رەسەيگە وتە قاجەت. مۇنى دۇرىس ءتۇسىنۋىمىز كەرەك. قازاقستان مەن رەسەي – ستراتەگيالىق سەرىكتەستەر. ارامىزدا شىنايى دوستىق پەن ءوزارا سەنىم بولۋى كەرەك. باسقا ساياسات ۇستانساق، ەكى ەلدىڭ ستراتەگيالىق مۇددەسىنە نۇقسان كەلتىرەمىز. جالپى، ءبىز ەشكىمگە ەشتەڭە دە قارىز ەمەسپىز. قازاقستان – ەگەمەن مەملەكەت. سوندىقتان ساياساتىمىز دا دەربەس”، – دەدى قازاقستان پرەزيدەنتى

"رەسەي – عاسىرلار بويى قاتار ءومىر ءسۇرىپ كەلە جاتقان قۇدايى كورشىمىزدىڭ ءبىرى. قازاقتىڭ تاعدىرىنا وسىلاي جازىلعان. مۇنى ءبىز وزگەرتە المايمىز. ساياسي، ساۋدا-ەكونوميكالىق جانە مادەني بايلانىستاردى نىعايتا بەرۋىمىز كەرەك. بۇل، ەڭ الدىمەن، قازاقستاننىڭ ستراتەگيالىق مۇددەسىنە ساي كەلەدى", – دەپ اتاپ ءوتتى ق. توقاەۆ.

بۇدان بولەك مەملەكەت باسشىسى كەيبىر رەسەيلىك ساياساتكەرلەردىڭ “قازاقستان وڭىرلەرىن رەسەيگە قوسىپ الۋ” تۋرالى ايتىپ جۇرگەن ماسەلەگە قاتىستى جاۋاپ بەردى.

“راسىندا دا، كەيبىر رەسەيلىك ساياساتكەرلەر تاراپىنان "قازاقستاننىڭ سولتۇستىك وبلىستارىنداعى جەرلەر بىزدىكى" دەگەن سوزدەر ايتىلعانىن جەتكىزدى.

ماعان ۆلاديمير ءپۋتيننىڭ ءوزى «جەرگە قاتىستى ەشقاشان ماسەلە كوتەرمەيمىز» دەپ ايتقان. سوندىقتان الاڭدايتىن ەشنارسە جوق. شەكارامىز تولىق ايقىندالعان، بەكىتىلگەن. بۇل اقيقاتتى بۇكىل الەم مويىندايدى. ەكى ەلدىڭ اراسىنداعى بايلانىستارعا سىزات تۇسپەگەن. رەسەي پرەزيدەنتى وسىنداي قاعيداتتارعا ادالدىعىن، بەرىكتىگىن كورسەتتى”، – دەيدى قاسىم-جومارت توقاەۆ.

Abai.kz