ەۋرازيا ەكونوميكالىق وداققا (ەاەو) مۇشە مەملەكەتتەر اۋىل شارۋاشىلىعى ونىمدەرىن تەمىر جول ارقىلى تەز جەتكىزۋ بويىنشا بىرلەسكەن جوبانى تالقىلاپ جاتىر.

بۇل ماسەلە 19 اقپاندا ەۋرازيا ەكونوميكالىق كوميسسياسىنىڭ ۆيدەو كونفەرەنتسيا ارقىلى وتكەن جينالىسىندا كوتەرىلدى. وعان قىرعىزستاننىڭ مينيسترلەر كابينەتى توراعاسىنىڭ ءبىرىنشى ورىنباسارى ارزىبەك كوجوشەۆ توراعالىق ەتتى.

قىرعىز ۇكىمەتىنىڭ ءباسپاسوز قىزمەتىنىڭ مالىمەتىنە قاراعاندا، وندا 27 ماسەلە قارالعان. سولاردىڭ ءبىرى وداق ىشىندە COVID-19 ۆيرۋسىنا قارسى ەكپە العانداردىڭ سەرتيفيكاتىن تانۋ ماسەلەسى دە بار.

ناتيجەسىندە جىل سايىن 29 مامىردا ەاەو كۇنىن اتاپ ءوتۋ جونىندە جانە 24-25 اقپاندا نۇرسۇلتاندا وداقتىڭ ۇكىمەت باسشىلارىنىڭ باس قوسۋىندا وتەتىن كەزدەسۋدىڭ كۇن ءتارتىبى قارالعان.

بىلتىر رەسەي مەن وزبەكستان تاشكەنت – ماسكەۋ "اگروەكسپرەسس" پويىزىن اشۋدى جوسپارلاپ جاتقانىن مالىمدەگەن. بۇل جوباعا قازاقستاندا قوسىلاتىنى، وزبەكستان ونىمدەرى الدىمەن قازاقستانعا، ءارى قاراي رەسەيگە جونەلتىلەتىنى ايتىلعان. كەيىن بۇل جوباعا قىرعىزستان دا قاتىسۋعا نيەت بىلدىرگەن. 2022 جىلى ەاەو-عا توراعالىق ەتۋ كەزەگى قىرعىزستانعا تيگەن.

Abai.kz