21 اقپاندا جاڭاوزەندەگى "بۇرعىلاۋ" كومپانياسى مۇنايشىلارىنىڭ ەڭبەك قاۋىپسىزدىگىن ساقتاپ، جۇمىس جاعدايىن جاقسارتۋدى تالاپ ەتكەن ەرەۋىلىنە 13 كۇن بولدى. ەرەۋىلشىلەر ازىرگە تالاپتارىنا ەشكىمنىڭ نازار اۋدارماعانىن ايتادى.

مۇنايشىلار ومىرگە قاۋىپتى ەسكى تەحنيكانى اۋىستىرىپ، "بۇرعىلاۋ" مەكەمەسىن "وزەنمۇنايگاز" كومپانياسىنا بولىمشە رەتىندە قوسۋدى تالاپ ەتەدى. نارازى مۇنايشىلار ابدەن ەسكىرگەن اۋىر ارنايى تەحنيكالاردىڭ ءوندىرىس باسىندا ءجيى ىستەن شىعىپ، ومىرلەرىنە ءجيى قاۋىپ توندىرگەنىن ايتادى. ولار "ەرەۋىلدە ەمەسپىز، ەڭبەك كودەكسىندەگى تالاپتى ساقتاۋدى سۇراپ تۇرمىز" دەيدى.

"بۇرعىلاۋ" مەكەمەسىنىڭ مۇنايشىسى باۋىرجان قۋانىشەۆتىڭ ايتۋىنشا، جۇمىس بەرۋىشىمەن بولعان بىلتىردان بەرگى بىرنەشە كەزدەسۋ ازىرگە ناتيجە بەرمەگەن. تالاپتى ورىنداۋ ورنىنا وزدەرىن "زاڭسىز ەرەۋىلگە شىقتى" دەپ سوتقا بەرگەنىن ايتادى.

- جۇمىس بەرۋشى ءبىزدى ەكى رەت سوتقا بەردى. بىرىنشىسىندە، تالاپتارىمىزدى ۆيدەو ۇندەۋ ەتىپ تاراتقانىمىز ءۇشىن سوتقا تارتتى. سوت ونى نەگىزسىز دەپ كەرى قايتاردى. ەكىنشىندە "ەرەۋىلدى زاڭسىز دەپ تانۋدى" سۇراپ ارىزداندى. سوت ول ارىزدى قاناعاتتاندىردى. ءبىز قازىر جۇمىس اۋماعىندا تۇرمىز، ۇيدە جاتقان جوقپىز. ەندى جۇمىستان شىعارامىز دەگەن قىسىم جاساعىسى كەلەدى،- دەيدى ول.

17 اقپاندا جاڭاوزەن سوتى سەرىك قالاباەۆ، قايرات ءابدىروۆ، باۋىرجان قۋانىشەۆ، ابىلاي المۇراتوۆ، يسا جەكسەنوۆ، ەرجان قۇلاتاەۆ، رامازان ابدىكارىموۆتى سوتقا تارتىپ، جۇمىس بەرۋشى وتىنىشىمەن "ەرەۋىلدى زاڭسىز دەپ تانىعان" شەشىم شىعارعان.

"بۇرعىلاۋ" مەكەمەسى كاسىپوداعىنىڭ توراعاسى ەرجان قۇلاتاەۆ مۇنداي سوتقا شاقىرۋدى مىڭعا جۋىق مۇنايشىنىڭ العانىن ايتادى.

"بۇرعىلاۋ" كومپانياسىنا قوڭىراۋ شالعانمەن ەشكىم ترۋبكانى كوتەرمەدى. كومپانيانىڭ رەسمي سايتىندا 19 اقپاندا سوتتىڭ بولعانىن راستاپ، نارازىلىق بىلدىرگەن مۇنايشىلاردى جۇمىسقا شىعۋعا شاقىرعان اقپارات جاريالانعان. بۇعان دەيىن مەكەمە سايتىندا مۇنايشىلار تالابىنا سايكەس 18 بولىمنەن تۇراتىن كومپانيا ۇستانىمى جاريالانعان. وندا تەحنيكالاردىڭ ۇنەمى جاڭارتىلاتىنىن، جۇمىسشىلاردىڭ ميلليون تەڭگەگە دەيىن جالاقى الاتىنىن، مەكەمەنى "قازمۇنايگاز" قۇرامىنا ەنگىزۋ جانە باسقا دا جۇمىسشىلار تالابىنىڭ ورىندالمايتىنى تۋرالى ايتىلعان. بىراق مۇنايشىلار بۇل جاۋاپپەن مۇلدە كەلىسپەيدى.

"بۇرعىلاۋ" جۇمىسشىلارى بۇعان دەيىن دە ەڭبەك جاعدايىن، جالاقى تۋرالى تالاپ ايتىپ ەرەۋىلگە شىققان. ولاردىڭ اپتاعا سوزىلعان ەرەۋىلدەرى 2016 جىلدىڭ شىلدە، قازان ايلارىندا بولعان ەدى.

"بۇرعىلاۋ" جشس ماڭعىستاۋداعى "وزەنمۇنايگاز", "ماڭعىستاۋمۇنايگاز" سياقتى ءىرى مۇناي-گاز ءوندىرۋشى كومپانيالارعا مۇناي جانە گاز ۇڭعىمالارى قۇرىلىسى، ۇڭعىمالاردى كۇردەلى جوندەۋ، ۇڭعىمالاردى يگەرۋ، ۇڭعىمالاردى جويۋ، كولىك قىزمەتتەرىن كورسەتەدى. كومپانيادا 2000-نان استام ادام جۇمىس ىستەيدى.

Abai.kz