ەلدەگى قاڭتار وقيعالارىنان سوڭ ۇقك توراعاسى كارىم ءماسىموۆ جانە ونىڭ ەكى ورىنباسارى داۋلەت ەرعوجين مەن ءانۋار سادىقۇلوۆ قاماۋعا الىنعان. ولارعا بيلىكتى كۇشتەپ باسىپ الۋ، قىزمەتىن اسىرا پايدالانۋ جانە مەملەكەتكە وپاسىزدىق جاساۋ باپتارىمەن قىلمىستىق ءىس قوزعالعان.

ەلدىڭ ەكس-پرەزيدەنتى نۇرسۇلتان نازارباەۆتىڭ جاقىن سەرىكتەرىنىڭ ءبىرى كارىم ءماسىموۆ ۇقك توراعالىعىنا 2016 جىلى كەلگەن. ەرعوجين، سادىقۇلوۆ، ءوسىپوۆ ونىڭ ورىنباسارى بولىپ 2016 جىلى تاعايىندالعان.

ءماسىموۆتىڭ ءبىرىنشى ورىنباسارى قىزمەتىن نازارباەۆتىڭ نەمەرە ءىنىسى سامات ءابىش اتقارىپ كەلگەن ەدى. ول دا قاڭتارداعى قىرعىننان سوڭ قىزمەتتەن كەتتى.

بيلىك قاڭتار وقيعاسىن مەملەكەتتىك توڭكەرىس دەپ اتاعان. بىراق توڭكەرىستى كىم جاساماق بولعانىن ناقتى اشىپ ايتپادى. رەسمي دەرەك بويىنشا، قاڭتار قىرعىنىىندا 227 ادام قازا بولىپ، جۇزدەگەن ادام قاماۋعا الىندى. قازىر 2,7 مىڭ قىلمىستىق ءىس قوزعالعان. ونداعان ادامنىڭ تۇرمەدە ازاپتالعانى دا ايتىلدى. باس پروكۋراتۋرانىڭ دەرەگىنشە، تۇرمەدەگى ازاپتاۋ كەزىندە التى ادام قازا تاپقان.

ساراپشىلار جىل باسىنداعى قاندى وقيعانى نازارباەۆ پەن قازىرگى پرەزيدەنت قاسىم-جومارت توقاەۆتىڭ اينالاسىنداعىلاردىڭ ەليتاارالىق قاقتىعىس دەگەن. اقوردا مەن نازارباەۆ ەليتاارالىق جانجالدى جوققا شىعارعان.

Abai.kz