قازاقستان مۇسىلماندارى ءدىني باسقارماسى مۇسىلماندارعا كريپتوۆاليۋتا پايدالانۋعا تىيىم سالدى. 

ءمۇفتيات مۇنداي شەشىم قابىلداۋعا ءۇش ءتۇرلى سەبەپ كەلتىرەدى. بىرىنشىدەن، شاريعاتقا سايكەس، كەز-كەلگەن اقشا مەملەكەتتەن شىعارىلىپ، ونىڭ قورعاۋىندا بولۋى ءتيىس.

"بيتكوين ۇلتتىق ۆاليۋتا ەمەس. بۇل ورتالىقسىزداندىرىلعان ۆيرتۋالدى اقشا، مەملەكەتتىك ورگاندار تاراپىنان كەپىلدىك بەرىلگەنىمەن، قارجىلىق زاڭدار ارقىلى قورعالماعان. ول كەز-كەلگەن ۋاقىتتا قۇلدىراپ، نە ءوسىپ كەتۋى مۇمكىن. بۇدان حالىق زارداپ شەگەدى", – دەلىنگەن حابارلامادا.

ەكىنشى سەبەبىن ءمۇفتيات بيتكوين-پروتسەستەردىڭ جابىق وتەتىنىمەن، مۇنىڭ الاياقتىققا الىپ كەلەتىنىمەن تۇسىندىرەدى. ۇشىنشىدەن، بيتكوين ۆاليۋتا نەمەسە تاۋار رەتىندە باقىلاۋعا الىنبايدى، بۇل ىشكى ەكونوميكاعا، قوعامعا كەرى اسەرىن تيگىزەدى دەلىنگەن.

كەمبريدج ۋنيۆەرسيتەتىنىڭ مالىمەتى بويىنشا، قازاقستان بيتكوين ماينينگ كولەمى بويىنشا الەمدە ەكىنشى ورىنعا شىققان، ۇلەسى 18,1 پايىز. ءبىرىنشى ورىندا اقش، ۇلەسى 35,4 پايىز. قازاقستاندا ماينينگتىڭ وسۋىنە ارزان ەلەكتر ەنەرگيا مەن سالىقتىڭ تومەندىگى سەبەپ بولعان. قازاقستان بيلىگى 2022 جىلدىڭ 1 قاڭتارىنان باستاپ ماينەرلەر ءۇشىن ەلەكتر ەنەرگياسى ءتاريفىن 1 تەنگەگە كوتەردى.

Abai.kz