ەكس-پرەزيدەنت نۇرسۇلتان نازارباەۆتىڭ ۇلكەن قىزى داريعا نازارباەۆا ماجىلىستەگى مانداتىن تاپسىرىپ، دەپۋتاتتىقتان كەتكەنى بەلگىلى بولدى. بۇل تۋرالى داريعا نازارباەۆانىڭ ءوزى مالىمدەگەن.

«بۇگىن ءماجىلىس دەپۋتاتى دەگەن مانداتىمدى ءوز ەركىممەن تاپسىرىپ بەرۋ تۋرالى شەشىمگە كەلدىم. ءارى قاراي تولىقتاي قوعامدىق، گۋمانتيارلىق، مادەني جانە قايىرىلىمدىلىق قىزمەتتەرمەن اينالىسپاقپىن»، - دەپتى ەكس-دەپۋتات.

قازاقستاننىڭ ساياسي ومىرىندە ايتارلىقتاي وزگەرىس جاساعان، جۇزدەگەن ادامنىڭ ءومىرىن قيعان قاسىرەتتى «قاڭتار وقيعاسىنان» بەرى ءۇنسىز جاتقان ەكس-دەپۋتات داريعا نازارباەۆا العىس ايتىپ، سول ءبىر «قاڭتار وقيعاسى» تۋرالى پىكىر ءبىلدىرىپتى.

«قاسىرەتتى «قاڭتار وقيعاسى» بىزگە بەيبىتشىلىكسىز، حالىق بىرلىگىنسىز قازاقستاننىڭ گۇلدەنۋى، ەلىمىزدىڭ ءارى قاراي دامۋى مۇمكىن ەمەس ەكەنىن كورسەتتى. وسى بولعان وقيعالار – ءبىزدىڭ حالقىمىز ءۇشىن اۋىر تراگەديا»، - دەپتى.

ول سونداي-اق، بولعان وقيعالاردى مۇۇقيات ءارى وبەكتيۆتى تۇردە زەرتتەۋ كەرەكتىگىن ايتقان. «كىنالىلەر انىقتالسا، ادىلەتتى تۇردە جازاعا تارتىلۋى، ال كىناسىزدەر بوساتىلۋى كەرەك. ءبىز وسى وقيعالاردان ساباق الۋىمىز كەرەك»، -  دەپتى نازارباەۆا.

ايتا كەتەيىك، داريعا نازارباەۆا جىل باسىنداعى «قاڭتار وقيعاسى» كەزىندە دە، ودان كەيىن دە ەل الدىنا شىققان جوق. ماجىلىستەگى جۇمىس ورنىنا كەلگەن جوق. ونىڭ كومەكشىسى داريعا نۇرسۇلتانقىزىنىڭ كوروناۆيرۋس جۇقتىرىپ، ەمدەلىپ جاتقانىن بىرنەشە مارتە حابارلاعان.

كەيىن داريعا نازارباەۆا دۋبايدا ءجۇر دەگەن دە اقپارات تارادى. ال ءماجىلىس دەپۋتاتى ايدوس سارىم باستاعان توپ داريعا نۇرسۇلتانقىزىنىڭ ەل الدىنداعى جاۋاپكەرشىلىگىن نۇسقاپ، «دەپۋتاتتىق مانداتىن تاپسىرۋى كەرەك», دەپ مالىمدەگەن. وسىدان كەيىن داريعا نازارباەۆانىڭ وتستاۆكاعا كەتۋىن تاراپ ەتكەن ارنايى پەتيتسيا دا ۇيىمداستىرىلدى.

Abai.kz