24 اقپان كۇنى كەشكىسىن ۋكرايناداعى چەرنوبىل اتوم ەلەكتر ستانتسياسىنىڭ ايماعى (اەس) رەسەيلىك اسكەريلەردىڭ باقىلاۋىنا ءوتتى. بۇل تۋرالى Reutersاگەنتتىگى ۋكراينا پرەمەر-ءمينيسترى دەنيس شميگالعا سىلتەمە جاساپ حابارلادى.

"بارىنشا كۇرەسكەنىمىزبەن چەرنوبىلدى ءبىز باقىلاۋدان شىعارىپ الدىق. بۇرىنعى اتومەلەكتر ستانتسياسىنداعى نىساندار، كونفاينمەنت جانە اتوم قالدىقتارى ساقتالعان ورىنداردىڭ قازىرگى جاعدايى بەلگىسىز. رەسەيلىكتەردىڭ شابۋىلدارىنان كەيىن اەس قاۋىپسىزدىگى جونىندە ءسوز ايتۋ قيىن. بۇل ەۋروپا ءۇشىن ەڭ قاۋىپتى", - دەدى ول.

وسىنىڭ الدىندا ۋكراينا پرەزيدەنتى ۆلاديمير زەلەنسكي رەسەيدىڭ وككۋپاتسيالىق كۇشتەرى چەرنوبىل اەس-ءتى الۋعا ارەكەت جاساپ جاتىر دەپ مالىمدەگەن. زەلەنسكي 1986 جىلعى تراگەديا قايتالانىپ كەتپەۋى ءۇشىن ۋكراين اسكەرلەرى جانىن بەرىپ جاتقانىن، ەگەر ول جەردە قانداي دا ءبىر وقيعا ورىن السا، بۇكىل ەۋروپاعا زاردابى تيەتىنىن ەسكەرتكەن.

1986 جىلدىڭ 26 ساۋىرىندە چەرنوبىل اتوم ستانتسياسىندا جارىلىس بولدى. سسسر باسشىلىعى بۇل وقيعانى العاش جاسىرىپ، كەيىن 31 ادام قايتىس بولدى دەدى. بىراق دۇنيەجۇزىلىك دەنساۋلىق ساقتاۋ ۇيىمى كەمىندە 9000 ادام قازا تاپتى دەگەن. "گرينپيس" ۇيىمى بۇل وقيعانىڭ سالدارىنان 200 مىڭ ادام قايتىس بولدى دەپ ەسەپتەيدى.

24 اقپاندا رەسەي پرەزيدەنتى ۆلاديمير پۋتين دونباسس تۇرعىندارىن "گەنوتسيدتەن قورعاۋ ءۇشىن" "ارنايى وپەراتسيا" باستالعانىن جاريالادى. پۋتين ۋكراينانى "اسكەرسىزدەندىرەمىز" دەدى. وسىعان دەيىن كرەمل ۋكرايناعا باسىپ كىرمەيمىز دەپ كەلگەن ەدى.

ۋكراينا تارابى كيەۆ، حاركوۆ، دنەپرگە راكەتادان شابۋىل جاسالعانىن مالىمدەدى. ۋكراينا شەكاراشىلارى بەلارۋس اسكەريلەرى دە رەسەي اسكەرىنە كومەكتەسىپ جاتقانىن مالىمدەدى. بىراق الەكساندر لۋكاشەنكو مۇنى جوققا شىعاردى.

ۋكراينا بيلىگى رەسەيدىڭ شابۋىلىنان كەمى 40 اسكەري قىزمەتكەر قازا بولعانىن حابارلادى. قازا تاپقاندار مەن جارالانعاندار اراسىندا بەيبىت تۇرعىندار دا بار.

Abai.kz