رەسەي اۋە كەڭىستىگىنىڭ جابىلۋى قازاقستان ءۇشىن ءتيىمدى بولماق. وسىعان بايلانىستى قازاقستان اۋە جولدارىنان ايىنا $1,5 ملن تابا الادى ەكەن. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى اقپارات بەردى.

مينيسترلىكتىڭ بولجامى بويىنشا، رەسەيگە قاتىستى سانكتسيالار ەلىمىزدىڭ اەروناۆيگاتسيالىق قىزمەت كورسەتۋ سالاسىنا قارجىلىق قىسىم كورسەتپەيدى.

"ەۋروپادان قىتايعا جانە وڭتۇستىك-شىعىس ازياعا وڭتۇستىك باعىت بويىنشا رەيستەر سانىنىڭ ارتۋىنان قازاقستان ايىنا $1,5 ملن كولەمىندە قوسىمشا تابىس تابۋى مۇمكىن", – دەيدى يدم.

"اۋە كەڭىستىكتەرىنىڭ جابىلۋىنا بايلانىستى ەۋروپادان وڭتۇستىك-شىعىس ازيا، ءۇندىستان جانە پارسى شىعاناعى ەلدەرىنە ترانزيتتىك ۇشۋلاردىڭ باسىم بولىگى قازىر ەۋروپانىڭ وڭتۇستىك بولىگىنىڭ دالىزدەرى ارقىلى ورىندالىپ جاتىر. وسى رەتتە اۋە قوزعالىسىنىڭ ءبىر بولىگى قارا تەڭىز ايماعىنان قازاقستانعا قايتا باعىتتالدى. سوڭعى تاۋلىكتە ەلىمىزدىڭ اۋە كەڭىستىگى ارقىلى جوسپاردا جوق 257 رەيس جاسالدى", - دەپ حابارلادى مينيسترلىك.

ۆەدومستۆودا اۋە قوزعالىسىن ۇيىمداستىرۋ بويىنشا بىرقاتار ارنايى شارالار قاراستىرىلعانىن اتاپ ءوتتى. ولار: قوسىمشا سەكتورلار اشۋ، كەزەكشى اۋىسىمداردى كۇشەيتۋ جانە ازاماتتىق-اسكەري ۇيلەستىرۋدىڭ ءوزارا ءىس-قيمىلى، تۇزەتىلگەن جانە بالاما باعىتتاردى ۇسىنۋ، قر اۋەايلاقتارىنا قونۋدى ورىندايتىن كەمەلەر ءۇشىن اۋە كەڭىستىگىن پايدالانۋعا رۇقسات بەرۋدى جەڭىلدەتۋ جانە باسقالارى.

قازىرگى ۋاقىتتا 32 مەملەكەت رەسەيگە اۋە كەڭىستىگىن جاۋىپ تاستادى.

Abai.kz