رەسەي مەن ۋكراينا اراسىنداعى قارۋلى قاقتىعىستا رەسەيدىڭ قانداي شىعىنعا ۇشىراعانى تۋرالى دەرەكتەر جاريالاندى.

بۇعان رەسەي قورعانىس مينيسترلىگى قازا بولعان رەسەيلىك ساربازداردىڭ سانىن جاسىرىپ كەلگەن بولاتىن.

ۋكراينا قورعانىس ءمينيسترىنىڭ ورىنباسارى اننا مالياردىڭ ايتۋىنشا، رەسەي ارمياسى 24-28 اقپان ارالىعىندا ۋكراينامەن سوعىستاعى ءتورت كۇن ىشىندە 29 ۇشاق، 29 تىكۇشاق، 3  ۇشۋ اپپاراتى جانە 5 اۋە شابۋىلىنا قارسى قورعانىس قۇرالدارىنان ايىرىلدى.

سونىمەن قاتار، ونىڭ ايتۋىنشا، وسى كەزەڭدە باسقىنشى 191 تانك، 816 اسكەري بروندى ماشينا، 291 اۆتوموبيل تەحنيكاسى، 60 تسيستەرنا جانە 2 كەمەدەن ايىرىلدى.

زەڭبىرەكتەردەن رەسەي ارمياسى 74 زەڭبىرەك، 1 «بۋك» پەن 21 «گراد» زەنيتتىك-زىمىران كەشەنىن جوعالتتى. جاۋ جاقتان جويىلعان ادام سانى شامامەن 5 300 ادام.

"اقپارات بولجاممەن بەرىلىپ وتىر، ءالى ناقتىلانۋى مۇمكىن. ۇرىستان كەيىن اقپارات الۋ وتە قيىن، ويتكەنى كومانديرلەردىڭ نازارى ەڭ الدىمەن سوعىستا. سونىمەن قاتار، ءبىز اقپاراتتى ۇرىس اياقتالعاننان كەيىن عانا الا الامىز، ال، ۇرىس ۋاقىتى ۇزاق. دەرەكتەر كەلەسى كۇنى نە بولماسا بۇرسىگۇنى كەلىپ جاتادى", – دەدى ءمينيستردىڭ ورىنباسارى.

بۇعان دەيىن رەسەي قورعانىس مينيسترلىگى رەسەيلىك ساربازداردىڭ شىعىنىن مويىنداعىسى كەلمەدى. تەك سوعىستىڭ ءتورتىنشى كۇنى قورعانىس مينيسترلىگى رەسەي اسكەري قىزمەتشىلەرىنىڭ اراسىندا قازا تاپقاندار مەن جارالانعاندار بار ەكەنىن مويىندادى.

Abai.kz