ۋكراينا پرەزيدەنتى ۆلاديمير زەلەنسكي ولكەنىڭ ەۋروپا وداعىنا (ەو) مۇشە بولىپ كىرۋى تۋرالى ارىزعا قول قويدى. بۇل تۋرالى مەملەكەت باسشىسىنىڭ ءوزى "تەلەگرام-كانالىنا" جازىپ، قول قويۋ كەزىنىڭ جانە قۇجاتتىڭ سۋرەتىن جاريالادى.

ارىز ەۋروپالىق كوميسسيانىڭ پرەزيدەنتى ۋرسۋلا فون دەر ليايەنگە جازىلدى. قۇجاتتىڭ قاشان قارالاتىنى بەلگىسىز. وسىعان دەيىن ولكەنىڭ پرەمەر-ءمينيسترى دەنيس شمىگال ۋكراينا ۇيىمعا ارنايى تارتىپپەن كەرەتىنىن بىلدىرگەن.

وسىعان دەيىن زەلەنسكي ۆيدەو ۇندەۋ جاساپ، ەۋروپا وداعىنا شۇعىل تۇردە ۋكراينانى قوسۋدى سۇراعان. ول ۋكراين ارمياسى ءوز جەرى ءۇشىن عانا ەمەس، جالپى ەۋروپا ءۇشىن سوعىسىپ جاتقانىن ايتىپ، "ۇيىمعا كىرۋگە لايىقتى" ەكەنىن جەتكىزگەن.

رەسەي پرەزيدەنتى ۆلاديمير پۋتين "دونباسستاعى حالىقتى قورعاۋ" تۋرالى مالىمدەمەسىنەن كەيىن ورىس اسكەرلەرى 24 اقپاندا ۋكرايناعا باسىپ كىردى. بەس كۇننەن بەرى ۋكراينانىڭ بارلىق ايماقتارىندا سوعىس ءجۇرىپ جاتىر.

Abai.kz