ۋكراينا پرەزيدەنتى ۆلاديمير زەلەنسكي قىرعىزستانداعى ەلشى ۆالەري جوۆتەنكو مەن گرۋزياداعى ەلشى يگور دولگوۆتى كەڭەسۋ ءۇشىن كەرى شاقىردى. بۇل تۋرالى زەلەنسكي Facebook جەلىسىندەگى ەفيرىندە ايتتى.

ۋكراينا باسشىسى قىرعىزستان بيلىگى "ۋكرايناعا قارسى اگرەسسيانى اقتاعانى ءۇشىن" ەلشىنى كەرى شاقىرىپ العانىن جەتكىزدى. زەلەنسكي گرۋزيا بيلىگى ۋكرايناعا ەرىكتى تۇردە كومەكتەسكىسى كەلگەندەرگە مۇمكىندىك بەرمەدى دەپ مالىمدەدى.

قىرعىزستان بيلىگى رەسەيدىڭ ۋكرايناعا باسىپ كىرگەنىنە قاتىستى رەسمي ۇستانىمىن بىلدىرمەگەن. بىراق 26 اقپاندا رەسەي بيلىگىنىڭ باقىلاۋىنداعى ريا نوۆوستي اگەنتتىگى "قىرعىزستان پرەزيدەنتى سادىر جاپاروۆ رەسەي پرەزيدەنتى ۆلاديمير پۋتينمەن تەلەفونمەن سويلەسكەندە كەزىندە رەسەيدىڭ دونباسستاعى بەيبىت تۇرعىنداردى قورعاۋ ارەكەتىنە قولداۋ ءبىلدىردى" دەپ جازعان.

بىراق قىرعىزستان پرەزيدەنتىنىڭ رەسمي سايتىندا "ەكى ەلدىڭ باسشىلارى حالىقارالىق جانە ايماقتىڭ قاۋىپسىزدىگى بويىنشا، سونىمەن قاتار ۋكرايناداعى جاعدايعا قاتىستى پىكىر الماستى" دەپ جازىلعان.

جاپاروۆتىڭ ءباسپاسوز حاتشىسى ەربول سۇلتانباەۆ 27 اقپاندا Facebook پاراقشاسىندا "ەكى تاراپ جاقىن ۋاقىتتا بەيبىتشىلىككە قول جەتكىزەدى دەپ ۇمىتتەنەمىز. ءبىز بۇل جاعدايدىڭ تەز ارادا كەلىسسوزدەر ارقىلى شەشىلگەنىن قولدايمىز" دەپ جازعان.

قىرعىزستان سىرتقى ىستەر ءمينيسترى رۋسلان كازاكباەۆ 27 اقپاندا ورتالىق ازيا ەلدەرى مەن اقش-تىڭ سىرتقى ىستەر ۆەدومستۆولارىنىڭ ونلاين كەزدەسۋىندە بىشكەك ۋكرايناداعى جاعدايعا الاڭداپ وتىرعانىن جەتكىزگەن.

"بۇل قاقتىعىس ەكى اعايىن حالىقتىڭ اراسىندا بولىپ جاتىر. قىرعىز حالقى ورىس حالقىمەن دە، ۋكراين حالقىمەن دە بۇرىننان دوستىق قارىم-قاتىناستا. بىراق قىرعىزستان قازىر الەم بىرىگۋدىڭ ورنىنا ءبولىنىپ جاتقانىنا قىنجىلادى" دەگەن كازاكباەۆ.

رەسەي 24 اقپاندا ۋكراينا اۋماعىنا كىرىپ، سوعىس باستاعان. سوعىس جالعاسىپ جاتقانىنا التىنشى كۇن بولدى. ەكى جاقتان دا ادام شىعىنى بار.

Abai.kz