مەيىرىم قالاۋي اتىراۋ قالاسىنىڭ اكىمى بولىپ تاعايىندالدى. "اتىراۋ وبلىسى اكىمىنىڭ وكىمى بويىنشا، اتىراۋ قالاسىنىڭ اكىمى تاعايىندالدى. ول - اتىراۋ وبلىسىنىڭ تۋماسى مەيىرىم قالاۋي", - دەلىنگەن حابارلامادا.

مەيىرىم قالاۋي 1985 جىلى اتىراۋ وبلىسىنىڭ قىزىلقوعا اۋدانىندا دۇنيەگە كەلگەن. 2006 جىلى اتىراۋ مەملەكەتتىك ۋنيۆەرسيتەتىن "مەملەكەتتىك جانە جەرگىلىكتى باسقارۋ" ماماندىعى بويىنشا، 2010 جىلى رف پرەزيدەنتى جانىنداعى رەسەي مەملەكەتتىك قىزمەت اكادەمياسىن بىتىرگەن. ەكونوميكا عىلىمدارىنىڭ ماگيسترى.

ەڭبەك جولىن 2006-2007 جىلدارى "اتىراۋ-اقپارات" كمك باستاعان.

2010-2011 جىلدارى "تۇران" جشس ديرەكتورى، "قازاقستان" رترك اتىراۋ وبلىستىق فيليالىندا ديرەكتوردىڭ ورىنباسارى - باس رەداكتور قىزمەتتەرىن اتقارعان.

2011-2012 جىلدارى "اتىراۋ-اقپارات" كمك ديرەكتورى بولعان. 2012-2016 جىلدارى اتىراۋ وبلىسىنىڭ جاستار ءىسى جونىندەگى باسقارماسىن باسقاردى.

2016-2019 جىلدارى وبلىس اكىمى اپپاراتى باسشىسىنىڭ ورىنباسارى، اتىراۋ قالاسى اكىمىنىڭ ورىنباسارى بولىپ جۇمىس ىستەگەن.

سونداي-اق، Nur Otan (Amanat) پارتياسىنىڭ Jas Otan جاستار قاناتىنىڭ اتىراۋ وبلىستىق فيليالىنىڭ حاتشىسى قىزمەتىن اتقارعان.

2019 جىلدان 2022 جىلعا دەيىن قالاۋي يندەر اۋدانىنىڭ اكىمى قىزمەتىن اتقاردى.

Abai.kz