10 ناۋرىزدا قىرعىزستانداعى باتكەن وبلىسىنىڭ قىرعىز-تاجىك شەكاراسى ماڭىندا اتىس بولدى. بۇل تۋرالى قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى حابارلادى.

رەسمي مالىمەتكە قاراعاندا، ساعات 10:50-دە شەكارادا مارتەبەسى انىقتالماعان تەسكەي دەپ اتالاتىن جەردە تاجىكستاننىڭ شەكارا وتريادى "بۇعان دەيىن بەلگىلەنگەن قوزعالىس باعىتىن بۇزىپ، شەكارا كۇزەتىنىڭ جاڭا مەجەسىنە ءوتىپ، سول جەردەگى قىرعىز شەكاراشىلارىنان كەتۋىن تالاپ ەتتى".

قىرعىزستان شەكارا قىزمەتىنىڭ مالىمەتىنشە، تاجىك شەكاراشىلارىنا قوسىمشا كۇش كەلگەن سول ولار جاڭا مەجەگە وتۋگە تالپىندى.

"الايدا قىرعىز شەكاراشىلارى تاجىكستان جاۋىنگەرلەرىنە جول بەرمەدى. اتىس شامامەن 10 مينۋتقا سوزىلدى. اتىستان قىرعىز جاعىنان ەشكىم زارداپ شەكپەدى", - دەپ حابارلادى ۇقمك شەكارا قىزمەتى.

ازاتتىق راديوسى تاجىك قىزمەتىنىڭ يسفاراداعى دەرەككوزىنىڭ حابارلاۋىنشا، اتىستان جارالانعاندار بار. يسفارا اۋرۋحاناسىنداعى دارىگەرلەرلەر دە بۇل اقپاراتتى راستادى، بىراق تاجىكستاننىڭ رەسمي بيلىگى ازىرگە مالىمەت تاراتقان جوق.

چوركۋ جامواتىنىڭ تۇرعىندارى مەن يسفارا قالاسى اكىمدىگىندەگى دەرەككوزدەردىڭ ايتۋىنشا، وقيعا № 4 قۇس شارۋاشىلىعى كووپەراتيۆىنىڭ ماڭىندا بولعان.

"وقيعا تاجىك شەكاراشىلارى اۋىسقان ۋاقىتتا بولدى. جاڭالارى كەلگەن ۋاقىتتا قىرعىز شەكاراشىلارى بىزدىكىلەردى بالاعاتتاپ، ودان سوڭ ەسكەرتۋسىز وق اتا باستادى. شەكاراشىلارىمىزدىڭ ءبىرى سول جەردە وپات بولدى، تاعى ءبىر شارۋا جارالاندى", - دەيدى دەرەككوز.

يسفارا تۇرعىندارىنىڭ ايتۋىنشا، جول اشىق بولعانىمەن حوجا الو مەن ۆورۋحقا قاراي ەشكىم ءجۇرىپ جاتقان جوق. قىرعىز اسكەرى جوعارى دەڭگەيدەگى دايىندىقپەن تۇر.

مالىمەتتەرگە قاراعاندا، شەكاراداعى وقيعادان سوڭ ەكى ەلدىڭ شەكاراشىلارى تەلەفونمەن سويلەسىپ، شەكارا كۇزەتىن وقيعا بولعان جەردەن الىپ كەتۋگە كەلىستى. ساعات 11:45-تە قىرعىزستان مەن تاجىكستان شەكاراشىلارى كەلىسسوز جۇرگىزە باستادى. قىرعىز-تاجىك شەكاراسى 970 شاقىرىمعا سوزىلىپ جاتىر، سونىڭ 519 شاقىرىمىنىڭ عانا مارتەبەسى انىقتالعان.

Abai.kz