باسىلىمدا جاريالانعان مالىمەتتەرگە قاراعاندا، رەسەيدىڭ 14-21 مىڭ ارالىعىنداعى ساربازى جارالانعان. ۋكرايناداعى سوعىسقا 150 مىڭعا جۋىق رەسەيلىك جاۋىنگەر تارتىلعان، دەپ جازدى The New York Times.

دەرەككوزدەر مۇنداي مالىمەتتىڭ اشىق دەرەككوزدەر، سونىڭ ىشىندە ۋكراينا قورعانىس مينيسترلىگىنىڭ اقپاراتى مەن سپۋتنيكتەن تۇسىرىلگەن سۋرەتتەر نەگىزىندە دايىندالعانىن ەسكەرتتى.

ۋكراينا بيلىگى كورشى ەلدىڭ باسقىنشىلىعى كەزىندە رەسەي شامامەن 14 مىڭ جاۋىنگەرىنەن ايرىلدى دەپ مالىمدەگەن. رەسەيدىڭ قورعانىس مينيسترلىگى بولسا ۋكراين جاعى 18 مىڭ سارباز جوعالتتى دەگەن مالىمەت تاراتتى.

رەسەيدىڭ قورعانىس مينيسترلىگى قازا تاپقان جاۋىنگەرلەر تۋرالى مالىمەتتى ءبىر مارتە عانا جاريالادى. مينيسترلىك 2 ناۋرىزدا 498 جاۋىنگەر وپات بولعانىن حابارلادى. ۋكراينا قورعانىس مينيسترلىگى قانشا جاۋىنگەرىنەن ايرىلعانىن ايتپادى. ۋكراينا پرەزيدەنتى ۆلاديمير زەلەنسكي 1300 ۋكراين ساربازى وپات بولعانىن وسى اپتادا مالىمدەگەن.

سوعىس ءجۇرىپ جاتقان ۋاقىتتا جانجالداسۋشى تاراپتاردىڭ مالىمەتەرىن تەكسەرۋ مۇمكىن بولماي وتىر.

رەسەي اسكەرى ۋكراينا اۋماعىنا 24 اقپاندا ۆلاديمير ءپۋتيننىڭ بۇيرىعىمەن باسىپ كىردى. ول كرەملدىڭ بۇل ارەكەتىن ناتو-نىڭ ۋكراينانى رەسەيگە قارسى فورپوستقا اينالدىرۋىنا جول بەرمەۋ دەپ ءتۇسىندىردى. ۋكراينا مەن ناتو بۇنى جوققا شىعارىپ وتىر.

Abai.kz