رەسەيدىڭ ۋكرايناداعى اسكەري اگەرسسياسىنا ارنالعان قاۋىپسىزدىك كەڭەسىنىڭ وتىرىسى بەيسەنبى كۇنى نيۋ-يوركتا ءوتتى.
"قانداي جاعداي بولماسىن، دەنساۋلىق ساقتاۋ مەكەمەلەرىنە قول سالۋ – حالىقارالىق گۋمانيتارلىق قۇقىقتى بۇزۋ بولىپ ەسەپتەلەدى",- دەدى ددسۇ باسشىسى.
ول بۇگىندە ورىس اسكەرىنىڭ قورشاۋىندا قالعان سۋمى جانە ماريۋپول قالالارىنا گۋمانيتارلىق كومەك جەتكىزۋدە قيىنشىلىقتار بولىپ جاتقانىن ايتتى. سونىمەن بىرگە باتىس ەلدەرىنىڭ وكىلدەرى رەسەيدىڭ ارەكەتىن سىنعا الىپ، ماسكەۋدى تەز ارادا سوعىستى توقتاتۋعا شاقىردى.
اقش مەملەكەتتىك حاتشىسى ەنتوني بلينكەن مەن ەۋروپا وداعىنىڭ سىرتقى ساياسات مەكەمەسىنىڭ باسشىسى دجوزەپ بوررەل رەسەيدى ۋكراينادا اسكەري قىلمىس جاساپ جاتىر دەپ ايىپتادى.
بلينكەن رەسەي پرەزيدەنتى ۆلاديمير ءپۋتيندى "اسكەري قىلمىسكەر" دەپ اتاعان اقش ليدەرى دجو بايدەننىڭ ايتقاندارىمەن تولىق كەلىسەتىنىن جەتكىزدى.
مەملەكەتتىك حاتشى سوزىندە ماريۋپولداعى ادامدار جاسىرىنىپ وتىرعان دراما تەاترعا جاسالعان سوققىنى جانە چەرنيگوۆ قالاسىندا 10 بەيبىت تۇرعىننىڭ قازا بولعانىن ەسكە سالدى.
Abai.kz
