بۇگىن ۋكراينادا سوعىس باستالعالى، كرەمل باسقارۋىنداعى رەسەي ارمياسى ۋكراينا تەرريتورياسىنا اشىق شابۋىل جاساي باستاعالى تۇپ-تۋرا ءبىر اي.

كەشەلى-بەرى ورىس ءھام ورىس ءتىلدى جۇرت رەسەيدىڭ قورعانىس ءمينيسترى سەرگەي شويگۋدى ىزدەپ ءجۇر. شويگۋ 11 ناۋرىزدان بەرى كوپشىلىك الدىنا شىقپاعان، باق-تا كورىنبەگەن. ءبىر ايدان بەرگى سوعىستىڭ تەڭ جارتىسىندا (16 كۇنى) رەسەيدىڭ قورعانىس ءمينيسترى قايدا ءجۇر؟ ونىڭ بۇل «جولاعىسى» جايلى پىكىرلەر دە ءارتۇرلى. سولاردىڭ ءبىرسىپىراسى، مىنەكەي:

ۋكراينا پرەزيدەنتى كەڭسەسىنىڭ كەڭەسشىسى ميحايل پودولياك: «رف كۇشتىك بلوگىنىڭ باستى فيگۋرانتتارىنىڭ كوپشىلىك نازارىنان جوعالىپ كەتۋى كوپشىلىكتى قىزىقتىرادى. سوڭعى ەكى اپتادان بەرى مينيستر شويگۋ مەن باس شتاب باسشىسى گەراسيموۆ ەل كوزىنە كورىنبەي كەتتى. جاريا پروتوكوللاردا دا ولاردىڭ اتتارى كورىنبەيدى»، - دەيدى. پودلياكتىڭ ايتۋىنشا، قازىر ءپۋتيننىڭ ماڭايىنداعىلاردان جاعى تالماي جاريا سويلەپ جۇرگەن جالعىز – لاۆروۆ ەكەن.

رەسەيدىڭ تاۋەلسىز «مەديازونا» مەن «اگەنتستۆو» جۋرنالدارى دا شويگۋ مەن گەراسيموۆتىڭ ءۇشتى-كۇيلى جوعالىپ كەتۋى جايلى جازىپتى. «سەرگەي شويگۋ – ەل الدىنا ءجيى شىعىپ جۇرگەن شەندىلەردىڭ ساناتىنان. ول رف قورعانىس مينيسترلىگىن تىزگىندەگەننەن باستاپ، اتالعان مينيسترلىكتىڭ ءباسپاسوز قىزمەتىندەگى شتات سانىن وسىرگەن. سول ارقىلى ءوزىنىڭ جانە مينيسترلىكتىڭ ءيميدجىن كوتەرۋگە ەدەل-جەدەل كىرىسىپ كەتكەن ادام. ول سوعىس تاستالعالى بەرى شويگۋ باق-قا ءجيى شىعىپ جۇرگەن. الايدا، 11 ناۋرىزدان بەرى مۇلدە كورىنبەي كەتكەن»، - دەپ جازادى «اگەنتستۆو».

اتالعان باسىلىمداردىڭ اقپاراتىنشا، سەرگەي شويگۋدىڭ دەنساۋلىعى سىر بەرگەن كورىنەدى. ول 18 ناۋرىزداعى رف پرەزيدەنتى ۆلاديمير پۋتين وتكىزگەن قاۋىپسىزدىك كەڭەسىنىنىڭ جيىنىنا دا قاتىسپاعان. كرەمل تاراتقان اقپاراتتا مينيستر شويگۋدىڭ اتالعان جيىنعا قاتىسقانى تۋرالى دەرەك ايتىلماعان. ولار تاراتقان فوتو، ۆيدەو قۇجاتاردا دا شويگۋ كورىنبەيدى.

رەسەيلىك جۋرناليست رومان سۋپەر: «كوپتەن بەرى سەرگەي شويگۋ كورىنبەي كەتتى. مۇمكىن ول قازىر ەڭبەك دەمالىسىندا شىعار»، - دەپ جازعان.

ال ۋكراينا قاۋىپسىزدىك كەڭەسىنىڭ حاتشىسى الەكسەي دانيلوۆ: «ءبىزدىڭ مەملەكەتىمىز جايلى ەگجەي-تەگجەيلى بىلمەي تۇرىپ، وسىنداي اۆانتيۋراعا بارعانداردى، سول ارقىلى ءپۋتيننىڭ ماقتاعان ارمياسىن جەرگە قاراتقانداردى انىقتاۋ ءجۇرىپ جاتىر. قازىر ءوز كۇشتىك قۇرىلىمدارى اراسىندا داۋلاسىپ جاتىر. فسب – اسكەريلەردى، اسكەريلەر – وزگە كۇشتىك قۇرىلىمداردى ايىپتاپ، ارالارىنان كىنالىلەردى انىقتاۋدا»، - دەپ جازىپتى.

تاقىرىپقا تۇزدىق رەتىندە ايتا كەتەيىك، وسىدان ءبىراز بۇرىن (7 ناۋرىزدا) امەريكالىق جۋرناليست جەيمس پاچيلەو: «رەسەيدىڭ قورعانىس ءمينيسترى سەرگەي شويگۋ دەگەنىڭىز جۋىق ارادا مەملەكەتتىك توڭكەرىس جاساپ، ءپۋتيندى تاقتان تايدىرۋى مۇمكىن»، - دەپ بولجام جاساعان ەدى.

ونىڭ پىكىرىنشە، پۋتين تۋۆانىڭ تۋماسى شويگۋدان تەگى ساقتانىپ وتىر. كەلەسى اپتادا «مەملەكەتكە ساتقىندىق جاسادى»، دەپ سوتتاۋى دا مۇمكىن.

ايتا كەتەيىك، سەرگەي شويگۋ قازىر 66 جاستا. رەسەيدىڭ قورعانىس مينيسترلىگىن 2012 جىلدان بەرى باسقارىپ كەلەدى.

نۇرگەلدى ابدىعانيۇلى

Abai.kz