«قازاقستان مۇناي ەكسپورتتاۋدىڭ بالامالى باعىتتارىن قاراستىرىپ جاتىر»،-  دەپ حابارلادى ەنەرگەتيكا مينيسترلىگىنىڭ ءباسپاسوز قىزمەتى.

«قازىرگى ۋاقىتتا ەنەرگەتيكا مينيسترلىگى كاسپي قۇبىر كونسورتسيۋمىمەن تەڭىز تەرمينالىنىڭ جۇمىسىن قالپىنا كەلتىرۋ مەرزىمدەرى بويىنشا كونسۋلتاتسيالار وتكىزىپ جاتىر. بۇل رەتتە مۇناي ەكسپورتىن بالامالى باعىتتار بويىنشا ۇلعايتۋ مۇمكىندىكتەرى پىسىقتالىپ جاتىر»، - دەلىنگەن قر ەنەرگەتيكا مينيسترلىگى اقپاراتىندا.

ەستەرىڭىزگە سالا كەتەيىك، 22 ناۋرىزدا قاتتى داۋىلدان نوۆوروسسيسك ماڭىندا تەڭىز تەرمينالىنداعى جىلجىمالى ايلاق قۇرىلعىلارى زاقىمدانعان. ناتيجەسىندە كقك ارقىلى مۇناي ەكسپورتىن ءۇش ەسە قىسقارتۋ قاۋپى تۋىندادى. بۇل مۇناي جەتكىزۋدى تاۋلىگىنە 1 ملن باررەلگە دەيىن قىسقارتىپ تاستاۋى مۇمكىن.

Abai.kz