«وتۆەت باجكەنوۆوي» YouTube ارناسىنا سۇحبات بەرگەن دەپۋتات ايدوس سارىم بۇرىنعى پرەزيدەنت نۇرسۇلتان نازارباەۆتىڭ قاڭتار وقيعاسىنا قاتىسى جوق ەكەنىن جەتكىزدى.

«ەكس-پرەزيدەنت – ەلباسىنىڭ قاڭتار وقيعاسىنا ەش قاتىسى جوق شىعار. ول ءۇشىن بۇل ناعىز شوك بولدى. بارلىق تۋىسقاندارى دۋبايعا قاشىپ كەتكەندە، ول الماتىدان ۇشىپ كەلدى. ول ءتىپتى ءوزىنىڭ قاۋىپسىزدىك قىزمەتىنە دە سەنبەدى، ونى كومەكشىسى اباي بيسەمباەۆ ءوز چارتەرىمەن، ءوز جەكە كولىگىمەن الماتىدان الىپ كەتتى.

ءسىز ءتىپتى بۇرىنعى پرەزيدەنتتىڭ ارنايى قىزمەتتەرگە قاتىستى قانداي دارەجەدە سەنىمسىزدىك تانىتقانىن ەلەستەتە الاسىز با؟ وسى اۋەجايدى ەكسترەميستەر باسىپ الماي تۇرىپ، ول استاناعا ۇشىپ ۇلگەردى. ءبىر عانا فاكت، بىراق بۇل ناقتى فاكت، ەكس-پرەزيدەنت ءوزىنىڭ كۇزەتىنە دە، مەملەكەتتىك كۇزەت قىزمەتىنە دە، كوميتەتكە دە سەنبەدى.

ونى قر پرەزيدەنتى ءىس باسقارۋشىسىنىڭ ءبىرىنشى ورىنباسارى بيسەمباەۆ قۇتقارىپ قالدى. ول ءوز كولىگىمەن پرەزيدەنتتى الىپ كەتتى. بۇل – ۇلكەن تراگەديا. مەن مۇندايدى ءوز باسىمنان وتكىزگىم كەلمەيدى»، – دەيدى ا.سارىم.

قاڭتار وقيعالارى كەزىندە الەۋمەتتىك جەلىلەر مەن باسىلىمدار «ەليتاارالىق كۇرەس، بۇرىنعى پرەزيدەنت پەن قازىرگى پرەزيدەنتتىڭ اراسىندا بيلىككە تالاس ءجۇرىپ جاتۋى مۇمكىن» دەگەن بولجامدى اقپارات تاراتتى.

دەگەنمەن، قاڭتار وقيعالارى كەزىندە ەل كوزىنەن جىراقتا بولعان ەكس-پرەزيدەنت نازارباەۆ 18 قاڭتار كۇنگى ۆيدەوۇندەۋىندە بۇل اقپاراتتى جوققا شىعارعان بولاتىن.

«ەليتا ىشىندە ءوزارا تالاس-تارتىس نەمەسە شيەلەنىس دەگەن جوق. وسى سيپاتتاعى قاۋەسەتتەر مۇلدەم نەگىزسىز»، – دەدى نۇرسۇلتان نازارباەۆ.

دەپۋتات تۇڭعىش پرەزيدەنت تۋرالى زاڭنىڭ جاڭا كونستيتۋتسيا قاراستىرىلعان كەزدە وزگەرەتىنىنە سەنەتىنىن ايتتى. دەگەنمەن ساياساتكەرىدىڭ ويىنشا ەگەر بۇرىنعى پرەزيدەنتتىڭ قانداي دا ءبىر قىلمىسقا كىناسى تىكەلەي دالەلدەنبەسە، ءتيىسۋدىڭ قاجەتى جوق ەكەنىن، سەبەبى تاريحي جەتىستىكتەرى كوپ دەپ ەسەپتەيتىنىن جەتكىزدى.

بۇعان دەيىن ءوز سۇحباتىندا مەملەكەت باسشىسى قاسىم-جومارت توقاەۆ تا بۇرىنعى پرەزيدەنتتىڭ 30 جىلدىق ەڭبەگىن جوققا شىعارماۋعا شاقىرعان بولاتىن.

«تاريحقا قيانات جاساماۋ كەرەك. نۇرسۇلتان نازارباەۆ – مەملەكەتىمىزدىڭ ىرگەسىن قالاعان، مەملەكەتتىگىمىزدى نىعايتۋعا زور ۇلەس قوسقان تۇلعا. ونىڭ قىزمەتىنە ءادىل باعا بەرۋگە مىندەتتىمىز. تۇڭعىش پرەزيدەنتتىڭ كەمشىلىكتەرى بولسا، ودان جاس باسشىلار ساباق الۋى قاجەت»، - دەدى توقاەۆ قازاقستان ارناسىنا بەرگەن سۇحباتىندا.

Abai.kz