رەسەي 30 ناۋرىزدان باستاپ قازاقستانمەن شەكاراسىندا كوروناۆيرۋسقا بايلانىستى ەنگىزگەن بارلىق شەكتەۋدى الىپ تاستايدى. بۇل جونىندە 24 ناۋرىزدا رەسەيدىڭ كوروناۆيرۋسپەن كۇرەس جونىندەگى جەدەل شتابى حابارلادى.

شتاب وكىلدەرىنىڭ ايتۋىنشا، 30 ناۋرىز تۇنگى ساعات 00-دەن باستاپ ەكى مەملەكەت ازاماتتارى رەسەي-قازاقستان شەكاراسىنان ەركىن وتە الادى. اقپاراتقا قاراعاندا، رەسەي موڭعوليامەن دە شەكاراسىن قايتا "اشپاق".

رەسەي قازاقستانمەن شەكاراسىن 2020 جىلى 30 ناۋرىزدا كوروناۆيرۋسقا بايلانىستى جاپقان ەدى. وسىعان دەيىن تەك بىرقاتار توپتار عانا شەكارانى كەسىپ وتە العان. قازىرگە دەيىن ەكى ەل اراسىندا اۋە قاتىناسى عانا قالپىنا كەلگەن. ال تەمىر جول قاتىناسى ءالى توقتاپ تۇر.

9 ناۋرىزدا رەسەي قازاقستان، قىرعىزستان، وزبەكستان، تاجىكستان، تۇركىمەنستان، ازەربايجان، ارمەنيا جانە يرانمەن كوروناۆيرۋسقا بايلانىستى اۋە قاتىناسىنا ەنگىزگەن شەكتەۋلەرىن الىپ تاستاعان ەدى. بۇل شەكتەۋ 2020 جىلدىڭ 27 ناۋرىزىندا ەنگىزىلگەن.

دەگەنمەن كەيىنگى كەزدە ۋكرايناداعى سوعىسقا بايلانىستى قازاقستان مەن رەسەي اراسىندا اۋە قاتىناسى باياۋلاعان.

Abai.kz