«ەۋروپا پليۋس قازاقستان» راديوستانتسياسىنىڭ بۇرىنعى جۇرگىزۋشىسى ليۋبوۆ پانوۆانىڭ ۇستىنەن «ۇلتارالىق ارازدىقتى قوزدىرۋ» بابى بويىنشا ءىس قارالاتىن بولادى. بۇل تۋرالى الماتى پوليتسياسى مالىمدەدى.

«الماتى قالاسى پوليتسيا دەپارتامەنتى پد تەرگەۋ باسقارماسىنىڭ اتالعان فاكتى بويىنشا سوتقا دەيىنگى تەرگەپ تەكسەرۋدىڭ بىرىڭعاي تىزىمىندە قر قك 174-بابىندا كوزدەلگەن قىلمىس بەلگىلەرى بويىنشا قىلمىستىق ءىس تىركەلگەنىن حابارلايدى. ءتيىستى ساراپتامالار تاعايىندالدى، ولاردىڭ ناتيجەلەرى بويىنشا تۇپكىلىكتى پروتسەسسۋالدىق شەشىم قابىلدانادى»، - دەپ حابار تاراتتى ءباسپاسوز قىزمەتى.

پانوۆا الەۋمەتتىك جەلىدە رەسەيدىڭ ۋكرايناعا باسىپ كىرگەنىن ايىپتاۋشىلارعا قاراتىپ «ۆوۆا اعايدى» كومەككە شاقىراتىنىن ايتقان.

ونىڭ ۆوۆا اعايى – باسقا-باسقا ەمەس، كرەملدىڭ قوجايىنى، رەسەي پرەزيدەنتى، بۇكىل وركەنيەتتى جۇرت ۋكرايناعا جاساعان باسقىنشىلىعى ءۇشىن گيتلەرگە تەڭەپ وتىرعان ۆلاديمير پۋتين.

الەۋمەتتىك جەلى قولدانۋشىلارى ونىڭ ءسوزىن قىزۋ تالقىلاپ، جۇرگىزۋشىنىڭ پىكىرىن «ارانداتۋشىلىق» دەپ باعالادى.

«ەۋروپا پليۋس قازاقستان» راديوستانتسياسى وقيعاعا قاتىستى تۇسىنىكتەمەسىندە: «ءبىزدىڭ قىزمەتكەر ليۋبوۆ پانوۆانىڭ الەۋمەتتىك جەلىلەردەگى جەكە اككاۋنتتارىندا ايتقان سوزدەرى، ونىڭ جەكە ۇستانىمى ءبىزدىڭ راديوستانتسيانىڭ ساياساتىنا ەش قاتىسى جوق دەپ مالىمدەيدى»، - دەپ جازىپ، ارتىنشا ونى جۇمىستان شىعارىپ جىبەردى.

ايتا كەتەيىك، 28 ناۋرىزدا قازاقستاننىڭ باس پروكۋراتۋراسى «ۇلتارالىق ارازدىقتى قوزدىرۋ»، «باسقا ولكەنىڭ ايماعىنداعى سوعىس ارەكەتتەرىنە قاتىستى ۇندەۋ جاساۋ»، «ونداي جانجالدارعا قاتىسۋ» جانە «قازاقستاننىڭ ايماقتىق تۇتاستىعىن بۇزۋعا شاقىرۋ» بويىنشا قىلمىستىق جاۋاپكەرشىلىك بار ەكەنىن ەسكەرتكەن بولاتىن.

Abai.kz