الگىندە ماسكەۋ قالالىق دۋماسىنىڭ دەپۋتاتى، رەسەي فەدەراتسياسى كوممۋنيستىك پارتياسىنىڭ مۇشەسى سەرگەي ساۆوستيانوۆ قازاقستان، بالتىق ەلدەرى مەن مولدوۆادا دا اسكەري وپەراتسيا وتكىزۋدى ۇسىنىپ: «قازاقستاندى دا «دەناتسيفيكاتسيالاۋ» كەرەك», - دەپ سويلەگەنىن بىلەسىزدەر.

بۇگىن قر سىرتقى ىستەر ءمينيسترى مۇحتار تىلەۋبەردى رەسەي دەپۋتاتىنىڭ سوعىس تىلەگەنە سول سوزدەرىنە قاتىستى پىكىر ءبىلدىرىپتى.

«رەسەيلىك دەپۋتات سەرگەي ساۆوستيانوۆتىڭ مالىمدەمەسىنە قاتىستى قازاقستان رەسەيگە نارازىلىق نوتاسىن جىبەرە مە؟» دەگەن سۇراققا: «فەدەرالدىق دەڭگەيدەگى مالىمدەمەلەرگە عانا رەاكتسيا بىلدىرەمىز»، - دەپ جاۋاپ بەرىپتى مينيستر تىلەۋبەردى.

«ايتىلعان ءاربىر مالىمدەمەلەردى جەكە-جەكە قاراستىرۋ كەرەك جانە سول دەڭگەيدە جاۋاپ بەرۋ كەرەك. مىسالى، بۇعان دەيىن زيۋگانوۆتىڭ ايتقاندارىنا ءبىزدىڭ دەپۋتاتتار جاۋاپ بەردى. ال مىنا مالىمدەمەنى ماسكەۋ قالالىق دۋماسىنىڭ دەپۋتاتى جاساپ وتىر. ول - فەدەرالدىق دەڭگەي ەمەس»، - دەيدى مۇحتار تىلەۋبەردى.

رەسەي ۋكرايناعا باسقىنشىلىق جاساعان ساتتەن باستاپ، رەسەيلىك ساياساتكەرلەردىڭ پوستكەڭەستىك ەلدەرگە قاتىستى كۇدىگى مەن تالاپتارى ارتا ءتۇستى. وزگە ەلگە تالاپ قويۋدان تايىنبايتىن باسقىنشىلار ەندىگى تاڭدا ءتىپتى، بيوزەرتحانالار اتتى تاقىرىپتى قىزدىرىپ جاتىر. ولار «ۋكراينا جەرىنەن بولەك، گرۋزيا مەن قازاقستاندا دا اقش-تىڭ بيوزەرتحانالارى بار»، - دەيدى. «ونى تەكسەرۋ كەرەك، تەكسەرمەسەك كوزىن جويۋ كەرەك»، - دەگەندى ەمىن-ەركىن ايتاتىن بولدى.

وسىدان بىرنەشە كۇن بۇرىن ماسكەۋ قالالىق دۋماسىنىڭ دەپۋتاتى، رەسەي فەدەراتسياسى كوممۋنيستىك پارتياسىنىڭ مۇشەسى سەرگەي ساۆوستيانوۆ ۋكرايناداعىداي، قازاقستان، بالتىق ەلدەرى مەن مولدوۆادا اسكەري وپەراتسيا وتكىزۋدى ۇسىنعان ەدى.

Abai.kz