قىرعىز-وزبەك شەكاراسىنداعى قارۋلى جانجالدان ەكى ادام مەرت بولدى. وقيعا 5 ساۋىردە كەشكە بولدى، دەپ حابارلادى قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ شەكارا قىزمەتى.

شەكاراداعى اتىستا 37 جانە 31 جاستاعى ەكى ادام وققا ۇشقان. مالىمەتتەرگە قاراعاندا، ولار وزبەكستاندا تۋعان، بىراق 2012 جىلى قىرعىز تولقۇجاتىن العان. ەكەۋىنىڭ دە وزبەك تولقۇجاتى بار.

الدىن الا مالىمەت بويىنشا، جالال-اباد وبلىسى اقسىي اۋدانىنا قاراستى دەيرەس اۋىلىندا سالت اتتى بىرنەشە قىرعىزستاندىق وزبەكستان اۋماعىنا تاۋار وتكىزۋ ماقساتىندا كورشى ەلدىڭ شەكاراسىنان وتكەن. ولار وزبەك شەكاراشىلارىنىڭ تالاپتارىن ورىنداۋدان باس تارتقان. زاڭ بۇزعانداردى ۇستاۋ كەزىندە اتىس بولعان.

"وزبەك شەكاراشىلارى ءوز ءومىرى مەن دەنساۋلىعىن ساقتاۋ ءۇشىن قارۋ قولداندى، ەكى بەيبىت تۇرعىن مەرت بولدى. قالعاندارى قىرعىزستانعا قاشىپ كەتتى", - دەپ حابارلادى شەكارا قىزمەتى.

وزبەك شەكاراشىلارىنىڭ مالىمدەۋىنشە، كونترابانداشىلار 20 مىڭ دوللاردان استام تاۋار وتكىزۋگە تالپىنعان.

ەكى ەلدىڭ شەكاراشىلارى وقيعا ورنىندا كەزدەسىپ، جاعدايدى تالقىلادى. ەكى جاق وسى وقيعا بويىنشا دەربەس زەرتتەۋ جۇرگىزەدى.

قىرعىزستان مەن وزبەكستان شەكاراشىلارىنىڭ كەلىسۋىمەن، وققا ۇشقانداردىڭ ءمايىتى قىرعىز جاعىنا تاپسىرىلدى.

Abai.kz