"نۇر-سۇلتان الەمنىڭ باسقا ەلدەرى سياقتى ۋكراينانىڭ اۋماقتىق تۇتاستىعىن قۇرمەتتەيدى." قازاقستان پرەزيدەنتى قاسىم-جومارت توقاەۆ امەريكالىق National Interest جۋرنالىنىڭ ۆەبسايتىندا جارىق كورگەن ماقالاسىندا ۋكرايناداعى سوعىسقا قاتىستى وسىلاي دەدى.

"قازاقستان مەن رەسەي الەمدەگى ەڭ ۇزىن شەكاراسى بار ەلدەر رەتىندە ەرەكشە قارىم-قاتىناس جاساپ كەلەدى. بۇعان قوسا ۋكراينامەن دە جاقىن دوستىق قارىم-قاتىناس بار. ءبىز الەمنىڭ باسىم بولىگىندەگى ەلدەر سياقتى ۋكراينانىڭ اۋماقتىق تۇتاستىعىن قولدايمىز" دەپ جازدى توقاەۆ.

قازاقستان پرەزيدەنتى رەسەيدىڭ ۋكرايناعا باسىپ كىرگەنىن "سوعىس" دەپ سيپاتتادى. كرەمل رەسەيدىڭ ىشىندە سوعىس دەگەن ءسوزدى قولدانۋعا تىيىم سالىپ، ۋكرايناعا باسقىنشىلىعىن "ارنايى اسكەري وپەراتسيا" دەپ اتايدى.

بۇعان قوسا توقاەۆ قاقتىعىستى بۇۇ جارعىسىنا ساي رەتتەۋگە ۇندەيدى ءارى ەكى ەل پرەزيدەنتتەرىن كەزدەسىپ، ماسەلەنى بەيبىت جولمەن شەشۋگە شاقىردى.

ەكى جىل بۇرىن توقاەۆ Deutsche Welle جۋرناليسىنە بەرگەن سۇحباتىندا قىرىمعا قاتىستى "اننەكسيا" ءسوزىن پايدالانۋ تىم اۋىر دەگەن ەدى. وسى سوزىنەن سوڭ ول ەلدە جانە شەتەلدە سىنعا قالعان.

ماسكەۋدىڭ وداقتاسى سانالاتىن قازاقستان بۇۇ باس اسسامبلەياسىنىڭ رەسەيدىڭ باسقىنشىلىعىن ايىپتايتىن قارارىنا داۋىس بەرگەندە قالىس قالعان ەدى. 5 ساۋىردە قازاقستان سىرتقى ىستەر ءمينيسترى مۇحتار تىلەۋبەردى ازاتتىق تىلشىسىنە "قالىس قالۋ دا پوزيتسيا", ء"بىز ۇلتتىق مۇددەمىزدى ەسكەرە وتىرىپ داۋىس بەردىك" دەدى.

توقاەۆ ماقالاسىندا قازاقستانداعى ساياسي جاعدايلار جايلى دا جازىپ، "ەلدەگى جۇيە بۇرىن بولعانداي بەلگىلى ءبىر ادامدار توبىنا ەمەس، بۇكىل حالىق ءۇشىن جۇمىس ىستەۋى كەرەك" دەدى ءارى قازاقستاندا "ساياسي بيلىك قايتا تەڭەستىرىلىپ", ەل "سۋپەرپرەزيدەنتتىكتەن" ء"نورماتيۆتى پرەزيدەنتتىك" جۇيەگە وتەدى دەپ سەندىردى.

قازاقستان پرەزيدەنتى الدا پارلامەنتتى كۇشەيتۋ ءۇشىن كونستيتۋتسيالىق وزگەرىستەر بولاتىنىن دا مەڭزەدى. بيىلعى قاڭتار وقيعاسىنان سوڭ سىنعا قالعان قازاقستان پرەزيدەنتى 16 ناۋرىزداعى جولداۋىندا ساياسي رەفورمالار بولادى دەپ ۋادە ەتكەن.

ساراپشىلار توقاەۆتىڭ "سۋپەرپرەزيدەنتتىكتەن باس تارتۋ" باستاماسىن كوسمەتيكالىق وزگەرىس دەپ سانايدى جانە اۆتوريتار باسقارۋ جۇيەسى سول قالپى ساقتالادى دەپ بولجايدى.

Abai.kz