ەلىمىزدىڭ بىرقاتار وڭىرلەرىن سۋ باسۋ قاۋپى ءالى دە سەيىلمەي تۇر. وسىعان وراي ءماجىلىس دەپۋتاتتارى ايماقتارعا ىسساپارعا شىعىپ، سۋ اپاتىنان زارداپ شەككەن تۇرعىندارمەن كەزدەسۋدە. دەپۋتاتتار مەملەكەت تاراپىنان كومەك كورسەتىلەتىنىن ايتىپ،  ماسەلەلەردى وزدەرىنىڭ ءجىتى باقىلاۋىندا ۇستايتىنىن جەتكىزدى.

اتاپ ايتقاندا، ءماجىلىس دەپۋتاتتارى قۇلشار مالىك پەن سنەجاننا يماشەۆا  باتىس قازاقستان وبلىسىنا بارىپ، سۋ تاسقىنىنان زارداپ شەككەن اۋدان تۇرعىندارىمەن كەزدەستى.

مالىك قۇلشار قاراتوبە اۋدانىنداعى شالعىن اۋىلىندا بالالاردىڭ وقۋى ۇيىمداستىرىلعان اۋىلدىق كلۋبتا مۇعالىمدەرمەن تىلدەسىپ، ءمان-جايدى تالقىلادى.

نەگىزگى مەكتەپتىڭ عيماراتىنا سۋ كىرىپ، بولمەلەردىڭ ورتاسى قۇلاعان. قازىر وقۋشىلار ۋاقىتشا اۋىلدىق كلۋبتا ءبىلىم الۋدا. اۋىلداعى 45 ءۇيدىڭ 29-نا سۋ كىرگەن، 23-ءى تۇرۋعا كەلمەيدى. اۋىل تۇرعىندارى سۋ كىرمەگەن ۇيلەرگە، 3-4 جانۇيادان ءبولىنىپ ورنالاسقان. قۇلاعالى تۇرعان ۇيلەردى ساراپتاۋ جونىندەگى كوميسسيا جۇمىس ىستەۋدە. اۋىل حالقى ەشقايدا كوشپەي، جاڭا مەكتەپ تە، ۇيلەر دە وسى اۋىلعا سالىنسا دەگەن وتىنىشتەرىن جەتكىزدى، – دەدى دەپۋتات.

سونداي-اق اۋداندا توتەنشە جاعداي جاريالانعاندىقتان ەشقانداي كونكۋرسسىز قارجى قاراستىرۋ مۇمكىندىگى بار ەكەنىن ايتىپ، قۇرىلعان كوميسسيانىڭ شەشىمىمەن اپاتتى جاعدايداعى مەكتەپ ورنىنا 60 ورىندىق ءبىلىم ورداسىنىڭ قۇرىلىسى باستالاتىنىن جەتكىزدى.

ساپار بارىسىندا دەپۋتاتتار جەرگىلىكتى بيلىك وكىلدەرىمەن بىرگە وبلىستاعى ءبورلى اۋدانى قىزىلتال اۋىلىنداعى سۋ تاسقىنىنان زارداپ شەككەن ۇيلەردى ارالادى. الداعى ۋاقىتتا سۋ تاسقىنىنان قورعانۋ ءۇشىن ارنايى نىسان سالۋ جوسپارلانىپ وتىر.

ال پاۆلودار وبلىسىندا ءماجىلىس دەپۋتاتتارى ايگۇل نۇركينا مەن ۆەرا كيم روجدەستۆەنكو اۋىلىندا سۋ تاسقىنىنان زارداپ شەككەن وتباسىلارىمەن كەزدەسىپ، ولارعا «AMANAT» پارتياسىنىڭ اتىنان تۇرمىستىق تەحنيكا، ازىق-تۇلىك، باسقا دا كەرەك-جاراقتارمەن كومەكتەستى.

– ءبىز ءاردايىم مونيتورينگ جاساپ وتىرمىز. بۇگىن ءوز كوزىمىزبەن كورۋگە كەلدىك. بايقاعانىمىزداي جاعداي تۇراقتالدى. ەندىگى باستى ماسەلە – ءتيىستى كومەك كورسەتۋ. اپات سالدارىن انىقتاپ، ءتيىستى شارالاردى قولعا الۋ»، – دەدى ايگۇل نۇركينا.

مامانداردىڭ ايتۋىنشا، سۋ تاسقىنىنىڭ ورىن الۋىنا ارنايى بوگەتتەردىڭ جوقتىعى سەبەپ بولىپ وتىر.

دەپۋتاتتار سۋ تاسقىنى ماسەلەسى ءجىتى باقىلاۋدا بولاتىنىن ايتتى. قاجەت بولعان جاعدايدا زاڭناماعا دا وزگەرىس ەنگىزىلۋى مۇمكىن.

جالپى روجدەستۆەنكو اۋىلىندا 30-عا جۋىق ءۇي ەرىگەن قار سۋىنان زارداپ شەكتى. وسىنىڭ سالدارىنان اۋداندا توتەنشە جاعداي جاريالانىپ،  100-گە تارتا تۇرعىن قاۋىپسىز جەرگە كوشىرىلىدى.

ءماجىلىس دەپۋتاتتارى امانعالي بەردالين مەن عالىمجان ەلەۋوۆ اقتوبە وبلىسى قوبدا جانە ويىل اۋداندارىنداعى سۋ باسۋ قاۋپى بار ەلدى مەكەندەردى ارالاپ، تابيعي اپاتتىڭ الدىن الۋ شارالارىمەن تانىستى.

قوبدا اۋدانىندا سۋ تاسقىنىنان بىرنەشە الەۋمەتتىك نىسان، سپورت كەشەنى مەن شاعىن جانە ورتا بيزنەس عيماراتتارى زارداب شەككەن. جارىق اۋىلىندا سۋارمالى جەرلەردى سۋ باسسا، ەگىندىبۇلاق اۋىلىندا سۋ تاسقىنىنان كەيىنگى جول قالپىنا كەلتىرىلۋدە.

ودان ءارى دەپۋتاتتار ويىل اۋدانىنا باردى. مۇندا سارالجىن اۋىلدىق وكرۋگىندە بولىپ، ورتا-قيىل-تاسساي سۋ جۇيەسىن باقىلادى. قازىرگى تاڭدا وكرۋگ بويىنشا 5600 گەكتار ليماندى القاپقا سۋ شىعىپ وتىر. بىلتىرعى جىلى جوندەۋدەن وتكەن سۋ جۇيەلەرى قازىر تاسقىن سۋدى ۇستاۋعا سەپتىگىن تيگىزۋدە.

دەپۋتاتاردىڭ وڭىرلەردەگى ساپارى ودان ءارى دە جالعاسۋدا.

Abai.kz