قازاقستاننان 30 جىل ىشىندە سىرتقا 100 ملرد-قا جۋىق دوللار اقشا شىعارىلعان. پرەزيدەنت توقاەۆتىڭ تاپسىرماسىنا سايكەس، ۇكىمەت سىرتقا شىققان اقشانى قازاقستانعا قايتارۋ ماسەلەسىن قاراستىرىپ جاتىر.

«1 ملرد دوللار عانا ەمەس ەكەنى تۇسىنىكتى. ناقتى سوماسىن ايتۋ وتە كۇردەلى. بىراق شامامەن 100 ملرد دوللاردان ءسال كوپ بولاتىن شىعار. تىكەلەي شەتەلدىك ينۆەستيتسيا تارتۋدى ايتساق، 30 جىلدا 400 ملرد دوللاردان استام قاراجات تارتىلعان. بۇل جەردە دە وسىنداي تاسىلمەن قاراۋ كەرەك»، – دەدى ۇلتتىق ەكونوميكا ءمينيسترى الىبەك قۋانتىروۆ.

«شەتەلگە زاڭسىز شىعارىلعان كاپيتالدىڭ سوماسى تۋرالى ايتساق، ول قانداي ۋاقىت كەزەڭى قارالىپ وتىرعانىنا بايلانىستى. بىراق بۇل جەردە بىرنەشە ونداعان ميلليارد دوللار جايىندا ءسوز بولىپ وتىر. ونىڭ ءبارى قالاي قايتارىلاتىنىنا كەلسەك، مۇندا ءتۇرلى مەحانيزمدەر بار. جاڭا تاسىلدەردى قاراساق، سالىقتىق جانە سالىقتىق ەمەس ىنتالاندىرۋ شارالارى قارالعان. سالىقتىق ىنتالاندىرۋ بويىنشا بەلسەندى جۇمىس ىستەپ جاتىرمىز. بۇل باعىت بويىنشا ەكى جاقتان ءىستى باستادىق. ءبىرىنشى باعىت – كاپيتالدى سىرتقا زاڭسىز شىعارۋدىڭ جولىن كەسۋ بولىپ سانالادى. مىسالى، سالىقتىق شارانىڭ ءبىرى – ينۆەستور تولەمەگەن ديۆيدەندتىڭ جەڭىلدىكتەرىن الىپ تاستاي الامىز»، – دەدى مينيستر ورتالىق كوممۋنيكاتسيالار قىزمەتىندە وتكەن بريفينگىدە.

Abai.kz