رەسەي اسكەرى مەن ۋكراينا ساربازدارى اراسىندا دونباسس ءۇشىن شەشۋشى شايقاس باستالدى. بۇل تۋرالى ۋكراينا قورعانىس مينيسترلىگى حابارلادى. رەسەي و باستا كيەۆتى جىلدام الىپ، ۋكراينانىڭ باتىسى لۆوۆقا دەيىن جەتىپ، سوعىستى رەجيمدى الماستىرۋ ارقىلى اياقتاۋدى ويلاعان بولاتىن. الايدا ماسكەۋدىڭ جوسپارى ىسكە اسپاي، كيەۆ وبلىسىندا جەڭىلىسكە ۇشىراعاننان كەيىن، اسكەرىن ۋكراينانىڭ شىعىسى مەن وڭتۇستىگىنە توپتاستىردى. ماسكەۋدىڭ جوسپارى وزگەردى جانە ۇرىس دالاسىنداعى جاعدايدى شىنايى باعالاي باستادى.

ساراپشىلار رەسەي حەرسوندى العاننان كەيىن، قىرىمعا قۇرلىق جولىن اشۋ مۇمكىندىگى تۋعانىن جاقسى تۇسىنەدى. سوندىقتان ءماريۋپولدى الىپ، حاركوۆتى باعىندىرىپ، رەسەيدەن قىرىمعا دەيىن قۇرلىق جولىن سالۋدى ويلاستىرۋدا دەيدى. بۇگىندە ماريۋپول قالاسى ءالى باسقىنشى رەسەي اسكەرىنىڭ قولىنا وتپەدى، قالانىڭ ورتالىق اۋداندارىن "ازوۆ" جاساقتارى مەن ۋكراينا ساربازدارى جانقيارلىق ەرلىكپەن قورعاۋدا. ءتىپتى رەسەي اسكەرى "سەندەردى ءتىرى قالدىرامىز، قارۋلارىڭدى تاستاپ، شىعىڭدار" دەپ ارنايى ءدالىز دە اشتى. الايدا بىردە-ءبىر سارباز بەرىلمەدى.

رەسەي 18 ءساۋىر كۇنى لۋگانسك پەن دونەتسك وبلىسىن ارتيللەريالىق سوققى استىنا الدى. بۇل ماسكەۋدىڭ ۇزاق دايىندالعان شابۋىلعا كوشكەنىن بىلدىرەدى. ۋكراينا پرەزيدەنتى زەلەنسكي دونباسس شايقاسىنىڭ باستالعانى جايلى بىلاي دەدى: "ەلىمىزدىڭ شىعىسى مەن وڭتۇستىگىندە باسقىنشىلار سوڭعى ۋاقىتتا شابۋىلدارىن بۇرىنعىعا قاراعاندا ويلاستىرىپ، جۇيەلى جاساۋعى تىرىسۋدا. قورعانىسىمىزدىڭ وسال تۇسىن ىزدەپ جاتىر، سول ارقىلى نەگىزگى كۇشتەرىن كىرگىزۋدى ويلاستىرۋدا.

رەسەي گەنەرالدارى ءوز اسكەرىنىڭ شىعىنىنا ءمان بەرە بەرمەيتىن، الايدا ەندى بارىنشا ساق قيمىلداۋعا تىرىسىپ باعۋدا. سەبەبى اسكەرى تاعى دا قىرىلسا، شابۋىلعا شىعاتىن ەشكىم قالماۋى مۇمكىن. بىراق ول ستراتەگيالارى ولارعا كومەكتەسپەيدى. ءبىزدىڭ تەرريتوريامىزدى تولىق ازات ەتۋ تەك قانا ۋاقىت ەنشىسىندەگى دۇنيە". 

ول دونباسس ءۇشىن سوڭىنا دەيىن شايقاساتىنىن اشىق ايتتى.

"رەسەي قانشا اسكەر اكەلسە دە، ءبىز كۇرەسەمىز. ءبىز بارىنشا قورعانامىز. كۇن سايىن جان اياماي شايقاسامىز. ۋكرايناعا تيەسىلىنى بەرمەيمىز، ال وزگەنىكى كەرەك ەمەس. مەن بارلىق ەرجۇرەك ساربازدارىمىزعا، دونباسستاعى قالالار مەن ماريۋپولگە، حاركوۆقا ءوز العىسىمدى ايتامىن، ولار بارىنشا شىداۋدا. ولار باسقىنشىنىڭ كۇشىن توقتاتىپ، ەلىمىزدى قورعاپ تۇر. رۋبەجنوە، پوپاسنايا، زولوتوە، ليسيچانسك، سەۆەرودونەتسك، كراماتورسك جانە وزگە قالالار وسى ۋاقىتقا دەيىن دە، قازىر دە، بولاشاقتا دا ۋكراينامەن ماڭگى بىرگە بولادى", - دەدى ول.

رەسەي جاڭا شابۋىلعا كوشكەنىنە بايلانىستى اقش بۇگىن شۇعىل كەڭەس وتكىزەدى. كەڭەسكە فرانتسيا، ۇلىبريتانيا، گەرمانيا، كانادا، يتاليا، پولشا، رۋمىنيا باسشىلارى جينالادى. باستى تاقىرىپ ۋكرايناعا تاعى قانداي قارۋ بەرۋگە بولاتىنىن تالقىلاۋ. پەنتاگون قازىردىڭ وزىندە ۋكرايناعا ۋادە ەتىلگەن اۋىر ارتيللەريا جۇيەلەرى جەتكىزىلگەنىن مالىمدەدى.

ماماندار پۋتين بيلىگى 9-مامىرعا دەيىن ءماريۋپولدى الىپ، دونباسستى تولىق باسىپ الۋدى بۇيىرعانىن ايتادى. سول ارقىلى حالقىنا "دونباسستى ازات ەتتىك" دەگەن ناسيحاتتى ۇسىنباق. بۇگىندە دونباسستا رەسەي 110 مىڭ اسكەر توپتاستىرعان، ال ءماريۋپولدى 25 مىڭ رەسەي اسكەرى قورشاپ تۇر. ۋكراينا تاراپىنان سوعىسقا 150 مىڭنان استام سارباز قاتىسۋدا.

Abai.kz