ۋكراينا ۇكىمەتى ەلدىڭ ەۋروپا وداعىنا قوسىلۋ جونىندەگى ساۋالنامانى تولتىردى. ۋكراينا پرەزيدەنتى كەڭسەسى باسشىسىنىڭ ورىنباسارى يگور جوۆكۆا وسىلاي دەپ مالىمدەدى.

رەسەي باسقىنشىلىعى باستالعالى بەرى ۋكرايناعا العاش رەت 8 ساۋىردە كەلگەن ەو وكىلدەرى پرەزيدەنت ۆلاديمير زەلەنسكيگە ەلدىڭ ەۋرووداققا مۇشە بولۋ ءوتىنىشىن قاراستىرۋعا قاجەتتى ساۋالناما قاعازىن تاپسىرعان. سول كەزدە زەلەنسكي بۇل قۇجاتتى كيەۆ ءبىر اپتادان سوڭ وتكىزە الادى دەپ مالىمدەگەن.

قۇجاتتى ۋكراين جاعى راسىمدەدى، ەندى كيەۆ سوعان قاتىستى كەڭەستەردى كۇتەدى، سوسىن "دوپ ەو جاعىنا تۇسەدى", دەدى جوۆكۆا. شەنەۋنىكتىڭ ايتۋىنشا، ەۋروپا كوميسسياسى ۋكراينانىڭ ەۋرووداققا مۇشە بولۋعا قاتىستى تالاپتارىنا قانشالىقتى ساي ەكەنىن انىقتاپ، كەڭەستەرىن ۇسىنادى. ۋكراين ۇكىمەتى ەۋروپا وداعىنىڭ جينالىسىندا ۋكراينا ەو-عا مۇشە بولۋعا ۇمىتكەر ەل مارتەبەسىن الادى دەپ بولجايدى. وداق جينالىسى ماۋسىم ايىندا وتەدى.

رەسەي باسقىنشىلىعىنا ۇشىراعان ۋكراينا 28 اقپاندا ەۋرووداققا جىلدام جولمەن كىرۋگە ءوتىنىش تاپسىردى. كەيىنىرەك ەۋروپارلامەنت دەپۋتاتتارى الدىندا سويلەگەن پرەزيدەنت ۆلاديمير زەلەنسكي رەسەي اگرەسسياسىنا قارسى كۇرەستە مىڭداعان وتانداسىنان ايرىلعان ۋكرانالىقتار ەو ەلدەرىن ۋكراينانى قولداۋ ءۇشىن بىرىگۋگە كوندىرە الدى دەپ مالىمدەدى. مەملەكەت ەۋروپانى تاڭدادى جانە تەڭقۇقىلى ەۋروپالىق ۇلت اتانۋ ءۇشىن ەۋروپا وداعىنا كىرگىسى كەلەدى، دەپ مالىمدەدى زەلەنسكي.

11 ناۋرىزدا ەو-نىڭ ۆەرسالداعى ءسامميتىنىڭ قورىتىندىلارىنا ارنالعان ءباسپاسوز كونفەرەنتسياسىندا فرانتسيا پرەزيدەنتى ەممانۋەل ماكرون ەۋروپالىق بلوك ۋكراينانىڭ ەو-عا قىسقا جولمەن قوسىلۋعا "جوق" دەپ جاۋاپ بەرەدى، ويتكەنى بۇل ەل سوعىسىپ جاتىر دەپ مالىمدەگەن.

Abai.kz