رەسەيدىڭ ۋكرايناداعى باسقىنشىلىعىنىڭ العاشقى كۇندەرى كيەۆ پەن ونىڭ تۇبىندەگى قالالاردا جۇمىس ىستەگەن ون ءبىر وزبەكستاندىق ءىز-ءتۇسسىز جوعالدى. وزبەكستاننىڭ سۇرقانداريا وبلىسىنان بارعان ەڭبەك ميگرانتتارىنىڭ حابارسىز كەتكەنىنە ءبىر جارىم اي بولدى.

ۋكرايناداعى "ايدار" باتالونىنىڭ بۇرىنعى جاۋىنگەرى، جيزاق تۋماسى شاۆكات مۇحاممادتىڭ وزودليك راديوسىنا حابارلاۋىنشا، سوڭعى مارتە ميگرانتتار تۋىستارىمەن حابارلاسقاندا كيەۆ وبلىسى بۋچا اۋدانى بۋزوۆايا اۋىلىندا ەكەنىن ايتقان.

شاۆكات مۇحامماد وزبەك ميگرانتتارى رەسەي اسكەرىنىڭ قولىنا ءتۇسىپ قالۋى مۇمكىن دەپ بولجايدى.

"جەكە وزىمە الەۋمەتتىك جەلىلەر ارقىلى كيەۆتەگى كەسكىلەسكەن ۇرىس قارساڭىندا 11 وزبەك جىگىتى جوعالىپ كەتكەنى تۋرالى حابار ءتۇستى. اقپاراتتاردى تانىستارىما تاراتتىم. ىزدەدىم. ولاردىڭ وزبەكستانداعى تۋىستارى تابىلدى. 11 جىگىتتىڭ جەتەۋى سۇرقانداريا وبلىسىنداعى ءبىر ماحاللادان ەكەن. ولاردى بىلەتىن بىرەۋ سەگىز ادامنىڭ تولقۇجاتتارىنىڭ كوشىرمەسىن جولدادى. ولار تۇتقىندا بولعان، سودان ول جەردەن قاشىپ، 3 ناۋرىزعا دەيىن كيەۆ شەتىندەگى اۋىلدا تۇرعان. سوڭعى رەت تۋىستارىمەن سول اۋىلدان حابارلاسقان. سودان بەرى حابار جوق. بۇل اۋىلداردا كەسكىلەسكەن ۇرىس ءجۇردى، قانشا ادام وپات بولدى. ول جىگىتتەردى سول اۋىلداردان ىزدەيمىن. ولاردىڭ ءبارى قاراپايىم ميگرانت. ولار ورىستاردىڭ قولىنا ءتۇسىپ قالسا كەرەك", — دەدى شاۆكات مۇحامماد.

بۋچا اۋدانىنىڭ بۋزوۆايا اۋىلىندا ءىز-ءتۇسسىز جوعالعان ميگرانتتار تۋرالى وزبەكستاننىڭ ۋكرايناداعى ەلشىلىگى حاباردار. ەلشىلىك ولاردىڭ وزبەكستانداعى تۋىستارىمەن بايلانىس ورناتقان. جوعالعان 11 ميگرانتتىڭ دەنى سۇرقانداريا وبلىسى دەناۋز اۋدانىنان كەلگەن.

وزبەكستان سىرتقى ىستەر مينيسترلىگىنىڭ مالىمەتىنشە، ۋكرايناداعى سوعىس باستالعانعا دەيىن بۇل ەلدە 4300 وزبەكستاندىق بولعان. وزبەكستان ۇكىمەتى 26 رەيسپەن 6 مىڭنان استام وزبەكستاندىقتى ۇرىس وشاعىنان شىعارعانىن حابارلادى.

Abai.kz