جاڭاوزەندە “وزەنمۇنايگازدىڭ” مۇناي ۇڭعىمالارىن جۋىپ تازالاپ، جوندەۋمەن اينالىساتىن “ترۋبرەمتسەنتر” جاۋاپكەرشىلىگى شەكتەۋلى سەرىكتەستىگىنىڭ 150 جۇمىسشىسى ەكى كۇننەن بەرى جۇمىستى توقتاتىپ تۇر. ەرەۋىلدەگەن جۇمىسشىلار جۇمىس جاعدايىن جاقسارتۋدى، جالاقىنى 60%-عا ءوسىرۋدى تالاپ ەتەدى.

جۇمىسشىلار قولدارىنا “مەكەمەگە مودەرنيزاتسيا جۇرگىزىلسىن”، “كاسىپوداق مۇشەلەرىن قۋدالاۋ توقتاتىلسىن”،”مەرەكەلىك كۇندەرگە 100% تولەنسىن”، “جالاقى 60% كوتەرىلسىن تالاپ ورىندالسىن!”، “گپح جۇمىسشىلارى شتاتقا الىنسىن” دەگەن پلاكاتتار كوتەرىپ شىقتى. ولار 19 ساۋىردە قازاقستان پرەزيدەنتىنە، ماڭعىستاۋ، جاڭاوزەن اكىمدەرىنە باعىتتالعان ۆيدەو جولداۋ جاساپ، تالاپتارىن مالىمدەگەن.

بيىل ماڭعىستاۋدا جالاقىنى كوتەرۋدى، جۇمىس ورىندارىن اشۋدى تالاپ ەتكەن ەرەۋىلدەر جيىلەدى. اقتاۋ قالاسىندا دا ArcelorMittal Tubular Products Aktau اكتسيونەرلىك قوعامىنىڭ جەتپىستەن اسا جۇمىسشىسى جالاقى كوتەرۋدى تالاپ ەتىپ، ءبىر اپتاعا جۋىق ۋاقىتتان بەرى جۇمىستى توقتاتىپ، ەرەۋىلدەپ تۇر.

جاڭاوزەن جۇمىسسىزدارىنىڭ ەكى ايعا سوزىلعان ەرەۋىلىن قۇقىق قورعاۋ ورگاندارى تاراتقان. جەرگىلىكتى بيلىك 400-گە جۋىق ادامدى جۇمىسقا ورنالاسقاندارىن ايتقانمەن، جۇمىس تالاپ ەتكەندەر قاتارى ازايعان جوق.

Abai.kz