باتىس سانكتسيالارىنا تاپ بولعان رەسەيلىك كومپانيالار وزبەكستاندى نەگىزگى بازا رەتىندە پايدالانىپ جاتىر. "شەتەل ونىمدەرى. ورتالىق ازيا" دەپ اتالاتىن كورمەدە ورىس-وزبەك ارىپتەستىگىنە بايلانىستى ونداعان كەلىسىم-شارتقا قول قويىلدى.

شاراعا قاتىسقان رەسەيلىك كومپانيالار وزبەكستانعا بيداي، ماي، فارماتسەۆتيكالىق تاۋارلار جانە باتىسقا ەندى ساتا المايتىن باسقا دا تاۋارلاردى ەكسپورتتاۋعا نيەت ءبىلدىرىپ وتىر.

بولشەكتەرىن ەۋروپادان الاتىن كاماز جانە Lada سەكىلدى كولىك شىعاراتىن كومپانيالار وزبەكستاننان زاۋىتتارىن اشپاقشى.

سانكتسياعا ىلىنگەن رەسەيلىك كومپانيالارمەن ارىپتەستىك جاساعان ەلدەر دە سانكتسياعا ىلىنە مە، ول جاعى ازىرگە بەلگىسىز. بۇل تەك تالقىلاۋ ۇستىندە.

وزبەكستان اقپارات قۇرالدارىنىڭ جازۋىنشا، تاشكەنتتە وتكەن ءۇش كۇندىك كورمەگە 200-گە جۋىق شەتەل كومپانياسى قاتىسقان. ولاردىڭ اراسىندا فرانتسيا، يتاليا، نيدەرلاند، ءۇندىستان جانە تمد ەلدەرىنىڭ كاسىپورىندارى بار.

رەسمي مالىمەت بويىنشا، كەلىسىم ناتيجەسىندە تاياۋدا وزبەكستاننان رەسەيلىك كومپانيالاردىڭ قاتىسۋىمەن ەكى ءىرى زاۋىت اشىلماقشى. ەكەۋى دە فارماتسەۆتيكالىق سالاعا بايلانىستى: ينسۋلين جانە حيميالىق دارىلەر شىعارادى.

نەگىزىنەن وزبەكستاننىڭ فارماتسەۆتيكالىق ءوندىرىسى وسىعان دەيىن دە رەسەي نارىعىنا شىققىسى كەلگەن. بىراق ەۋرازيالىق ەكونوميكالىق وداقتىڭ تالاپتارى كەدەرگى بولعان.

بىرەر كۇن بۇرىن وزبەكستان پرەزيدەنتى شاۆكات ميرزياەۆ رەسەيدىڭ ساۋدا جانە ءوندىرىس ءمينيسترى دەنيس مانتۋروۆ پەن بەلارۋس پرەمەر-ءمينيسترى رومان گولوۆچەنكونى قابىلداعان. كەزدەسۋ مۇناي، كولىك جانە اۆياتسيا سالالارىنداعى ىنتىماقتاستىققا قاتىستى بولعان.

ناتيجەسىندە رەسەي - تۇركيا - باتىس نەمەسە رەسەي - ورتالىق ازيا - باتىس سحەماسى بويىنشا باتىس سانكتسيالارىنان اينالىپ ءوتۋ جولى قاراستىرىلعان.

بۇل كورمەنى وتكىزۋگە دەمەۋشىلىك جاساعان رەسەيدىڭ گازپرومبانك، روسسەلحوزبانك، روساتوم، USM سەكىلدى ءىرى كومپانيالارى بولعانىن اتاپ ءوتۋ كەرەك.

Abai.kz