1 مامىر – قازاقستان حالىقتارىنىڭ بىرلىگى كۇنىنە وراي «Spectrum» حالىقارالىق مەكتەبىنىڭ ۇيىمداستىرۋىمەن قايرىمدىلىق جارمەڭكەسى ءوتتى.

اۋقىمدى ءىس-شارادا 22 ەلدىڭ ۇلتتىق-مادەني مۇراسى، سالت-ءداستۇرى مەن تاعامدارى تانىستىرىلىپ، كوپشىلىككە ۇسىنىلدى. مەرەكەگە ارنايى دايىندالعان ساحنالىق قويىلىمدار مەن ءار ۇلتتىڭ ءتول ونەرى «Spectrum» حالىقارالىق مەكتەبى وقۋشىلارىنىڭ قاتىسۋىمەن ءوتتى. ال، قايىرىمدىلىق جارمەڭكەسىنەن تۇسكەن قانداي دا قاراجات مەكتەپ اتا-انالارى باسشىلىعىمەن ەلىمىزدەگى كومەككە مۇقتاج جانۇيالارعا تابىستالادى. وسى جىلعى قايىرىمدىلىق شاراسىنا ەلىمىزدىڭ جانە شەت ەلدەردىڭ ءتۇرلى سالاداعى ۇيىمدارى ات سالىسىپ، ءوز ۇلەسىن قوستى. اتاپ ايتار بولساق، مەرەكەگە وراي ويناتىلاتىن لوتەرەيا ىشىندە مالديۆ ارالدارىنداعى ءتۇرلى دەمالىس ورىندارىنا 4 جولداما بەرىلدى. شارتى تەك كورمەگە قاتىسىپ، قايىرىمدىلىق ءۇشىن قۇنى 5000 تگ تۇراتىن بيلەت الۋ كەرەك بولاتىن. ال، جولداماعا دەمەۋشى بولعان كاسىپكەرلەر بۇل سىيدى قايىرىمدىلىققا قوسقان ءوز ۇلەسىمىز دەگەن ۇستانىمدا. ىزگىلىكتى شارا ءداستۇرلى تۇردە ونىنشى رەت وتكىزىلىپ وتىر. فەستيۆالدىڭ وتۋىنە اتالمىش مەكتەپتىڭ وقۋشىلارى، اتا-انالارى، ەلشىلىكتەر مەن ديپلوماتيالىق ميسسيا وكىلدەرى مۇرىندىق بولدى.

«Spectrum» حالىقارالىق مەكتەبى – ەلورداداعى جەرگىلىكتى جانە شەتەلدىك ءبىلىم الۋشىلارعا جوعارى ستاندارتتارعا ساي كەمبريدجتىك حالىقارالىق ءبىلىم بەرۋ باعدارلامالارى مەن ەمتيحاندارىن ۇسىناتىن وقۋ ورنى.
قازىرگى تاڭدا حالىقارالىق مەكتەپتەر ۇيىمىنىڭ (Council of International Schools) تۇراقتى، ەۋروپانىڭ حالىقارالىق مەكتەپتەر ۇيىمىنىڭ (Europian Council of International Schools) پرەميۋم مۇشەسى. مەكتەپتىڭ نەگىزگى ۇستانىمدارىنىڭ ءبىرى ول – ينتەرناتسيوناليزمنىڭ وزىق ۇلگىسىندە ءوزارا تۇسىنىستىك، توزىمدىلىك جانە سىيلاستىق ۇعىمدارىن العا تارتا وتىرىپ ءبىلىمدى، بىلىكتى جاستاردى تاربيەلەۋ.

Abai.kz