تۇركىمەنستانداعى مولدالار ورازا ايتتاعى مەرەكەلىك نامازدا ەكس-پرەزيدەنت گۇربانگۇلى بەردىمۇحامەدوۆتىڭ ء"ومىرىمنىڭ ءمانى" اتتى جاڭا كىتابىن وقىدى. "حرونيكا تۋركمەنيستانا" تاۋەلسىز باسىلىمىنىڭ حابارلاۋىنشا، كىتاپ وقۋ ءساتى مەملەكەتتىك اقپارات اگەنتتىگى دايىنداعان رەپورتاجدا كورسەتىلدى.

گۇربانگۇلى بەردىمۇحامەدوۆتىڭ جاڭا كىتابى ء"ومىرىمنىڭ ءمانى" دەپ اتالادى. مەملەكەتتىك اقپارات اگەنتتىگى ەكس-پرەزيدەنتتىڭ بۇل شىعارماسىن "تۇركىمەن حالقىنىڭ مىڭداعان جىلدار بويى ۇرپاقتان ۇرپاققا تارالىپ كەلە جاتقان دانالىعى مەن ۇلتتىق رۋحاني قۇندىلىعى" دەپ سيپاتتادى. كىتاپتى 29 ساۋىردە اۆتوردىڭ ۇلى، تۇركىمەنستان پرەزيدەنتى سەردار بەردىمۇحامەدوۆ تانىستىردى.

بيلىكتى ۇلى سەردارعا تاپسىرعان گۇربانگۇلى بەردىمۇحامەدوۆ ساۋىردە پرەزيدەنتتەن دەمالىس سۇرادى. ول دەمالىس كەزىندە جاڭا كىتابىن اياقتايتىنىن ايتتى. ونىڭ دەمالىسى قانشاعا سوزىلاتىنى حابارلانبادى.

گۇربانگۇلى بەردىمۇحامەدوۆ 60-تان استام كىتاپتىڭ اۆتورى. ونىڭ شىعارمالارى سان-الۋان تاقىرىپتارعا ارنالعان. ساياساتكەر مەملەكەتتى باسقارۋ، حالىقارالىق قاتىناستار، دارىلىك شوپتەر، جىلقى شارۋاشىلىعى، يت اسىراۋ تۋرالى شىعارما جازدى. ونىڭ كىتاپتارىن ەلدەگى وقۋ ورىندارى زەرتتەيدى، مەملەكەتتىك باق-تىڭ تىكەلەي ەفيرىندە وقىلادى.

Abai.kz