نازارباەۆتىڭ ەسىمى ەل كونستيتۋتسياسىنا جازىلمايتىن بولدى. بۇل وتكەن كۇننىڭ باستى جاڭالىعى. بۇعان دەيىن كونستيتۋتسياعا نۇرسۇلتان نازارباەۆتى "تاۋەلسىز قازاقستاننىڭ نەگىزىن قالاۋشى" دەپ بەكىتۋ ماسەلەسى كوتەرىلىپ، ەل اراسىندا داۋ تۋىنداعان ەدى. 

مەملەكەتتىك حاتشى ەرلان قارين بۇل تۋرالى بىلاي دەپ جازدى:

"كونستيتۋتسيالىق كەڭەس ەلىمىزدىڭ اتا زاڭىنا ەنگىزىلەتىن تۇزەتۋلەردىڭ جوباسىنا وڭ قورىتىندى بەردى.

بۇل مەملەكەتىمىز بەن ۇلتتىمىزدىڭ بولاشاعى ءۇشىن ايرىقشا مانگە يە كونستيتۋتسيالىق رەفورمانى ىسكە اسىرۋدىڭ ماڭىزدى كەزەڭدەرىنىڭ ءبىرى.
كونستيتۋتسيالىق رەفورما بيلىك تارماقتارى اراسىنداعى قارىم-قاتىناس بالانسىن وڭتايلاندىرۋعا، حالىقتىڭ مەملەكەتتى باسقارۋ ىسىنە ارالاسۋىن كەڭەيتۋگە، ازاماتتاردىڭ كونستيتۋتسيالىق قۇقىقتارىن قورعاۋدى كۇشەيتۋگە باعىتتالعان.

سونداي-اق، جۇمىس توبىنىڭ كەيبىر مۇشەلەرىنىڭ ۇسىنىسىن ەسكەرە وتىرىپ، كونستيتۋتسيالىق كەڭەسكە تۇڭعىش پرەزيدەنتتىڭ مارتەبەسىنە قاتىستى نورمانى الىپ تاستاۋ تۋرالى قوسىمشا ءوتىنىش جىبەرىلگەن بولاتىن. جۇمىس توبى مۇشەلەرىنىڭ پىكىرىنشە، تۇڭعىش پرەزيدەنتتىڭ تاريحي ءرولى جۇرتشىلىققا ايان جانە كونستيتۋتسيادا بولەك بەكىتۋدى قاجەت ەتپەيدى.
كونستيتۋتسيالىق كەڭەس ۇسىنىلعان تۇزەتۋلەردىڭ بارلىق تارماعىن اتا زاڭعا سايكەس دەپ قورىتىندى جاسادى.

كونستيتۋتسيالىق رەفورما مەملەكەتتىك-ساياسي مودەلدى جۇيەلى تۇردە ترانسفورماتسيالاۋعا باعىتتالعان جانە ول بارشا قوعام وكىلدەرىنىڭ مۇددەسى ءۇشىن جۇزەگە اسىرىلادى", - دەدى.

ەلباسى تۋرالى كونستيتۋتسياعا جازىلمايتىن وزگەرىستى قوعام بەلسەندىلەرى دە قىزۋ تالقىلاپ جاتىر.

جۋرناليست دينا ەلگەزەك؟

ء"سۇيىنشى، قازاعىم! “نۇرسۇلتان نازارباەۆ - مەملەكەتىمىزدىڭ نەگىزىن قالاعان” دەگەن باپ كونستيتۋتسيادان الىنىپ تاستالاتىن بولدى. نازارباەۆتىڭ ءوزى مەن وتباسىن قورعايتىن 46-باپ جويىلادى. سوعان سايكەس، “تۇڭعىش پرەزيدەنت تۋرالى” زاڭ دا كۇشىن جويادى. ياعني نازارباەۆ پەن ونىڭ وتباسى كونستيتۋتسيانىڭ ارنايى باپتارىمەن، جەكە زاڭ تارماقتارىمەن دە قورعالمايتىن بولدى. مەنى قولداعان بارشا باۋىرعا مىڭ العىس! ءدۇيىم حالىقتىڭ پىكىرىن ەسكەرگەن مەملەكەت باسشىسى قاسىمجومارت توقاەۆقا جەكە العىس بىلدىرەمىن", - دەپ جازدى.

"نازارباەۆ تۋرالى باپتى كونستيتۋتسيادان الىپ تاستايتىن شەشىمدى قولدايمىن. بۇل ءبىزدى قۋانتاتىن فاكت بولدى. جەكە باسقا تابىنۋدان ارىلۋ ادىلەتتى قازقاستانعا قادام باسۋدىڭ العىشارتى بولۋى كەرەك. ءبىز ادىلەتتىلىكتىڭ نە ەكەنىن ۇمىتا باستاعان حالقىمىزعا سول سەزىمدى قايتارۋىمىز كەرەك. ادىلەتتىلىك بولماسا جاستاردىڭ بولاشاققا دەگەن سەنىمى بولمايدى. 

بۇل وزگەرىسپەن توقتاپ قالماۋ كەرەك. ەندى ءبىز استانانىڭ، كوشە اتتارى مەن ۋنيۆەرسيتەت، مەكتەپ، اۋەجاي مەن ەسكەرتكىش اتاۋلارىن وزگەرتۋدى قالايمىز. بۇل جەكە باسقا تابىنۋدىڭ ناقتى كورىنىسى عوي", - دەپ جازدى مۇحتار تايجان.

Abai.kz