رەسەي اسكەرىنىڭ 16 ناۋرىزدا ماريۋپولدەگى دراما تەاترعا جاساعان اۋە سوققىسىنان شامامەن 600 ادام قازا تاپتى. تەاتر عيماراتىنا مىڭعا جۋىق ادام تىعىلعان، دەپ جازدى Associated Press. اگەنتتىك وسى وقيعانى زەرتتەگەن.

جۋرناليستەر اۋە سوققىسىنان امان قالعان 23 اداممەن، قۇتقارۋشىلارمەن، تەاتر عيماراتىن جاقسى بىلەتىندەرمەن سويلەسىپ، سوققىعا دەيىن جانە كەيىن تۇسىرىلگەن سۋرەتتەر مەن ۆيدەولاردى ساراپتادى. بۇل اقپارات تەاتردىڭ 3D-نۇسقاسىن جاساۋعا قاجەت بولدى. كۋاگەرلەر سونىڭ كومەگىمەن ادامدار تەاتردىڭ قاي جەرلەرىن پانالاعانىن جۋرناليستەرگە كورسەتتى.

16 كۋاگەر عيماراتتا ادام كوپ بولعانى سونشا، ءاربىر ءۇش شارشى مەترگە ءبىر ادامنان كەلەتىنىن ورنالاسقانىن ايتتى. ادامدار بولمەلەردە، دالىزدەردە وتىرعان. عيمارات ماڭىنداعى دالا اسحانادا جۇزگە جۋىق ادام بولعان. ولاردىڭ ءبارى قازا تاپتى.

سوققىدان امان قالعان ەكى ادام تەاتردا 300-گە جۋىق ادام وپات بولدى دەپ ەسەپتەگەن. قالا بيلىگى دە اۋەلى وسى مالىمەتتى جاريالاعان. ماريۋپول پوليتسياسىنىڭ ءبىر قىزمەتكەرى مەن قىزىل كرەست وكىلى اۋە سوققىسىنان كەم دەگەندە 500 ادام قازا تاپتى دەپ بولجادى. Associated Press مايىتتەردىڭ كەيبىرىن رەسەيلىك اسكەريلەر الىپ كەتكەن دەپ توپشىلادى.

اگەنتتىك زەرتتەۋشىلەرى سوعىس جاعدايىندا ناقتى قانشا ادام قازا تاپقانىن انىقتاۋ مۇمكىن ەمەستىگىن ەسكەرتتى.

اۋە سوققىسى قارساڭىندا سپۋتنيكتەن تۇسىرىلگەن سۋرەتتە تەاتر عيماراتى الدىندا "دەتي" دەگەن جازۋ انىق كورىنىپ تۇر. ەقىۇ تەاترعا جاساعان شابۋىلدى حالىقارالىق گۋمانيتارلىق قۇقىقتى بۇزۋ، اسكەري قىلمىس دەپ اتادى.

رەسەي قورعانىس مينيسترلىگى ماريۋپول دراما تەاترىن وسى عيماراتقا جاسىرىنعان ۋكراين اسكەريلەرى جاردى دەپ مالىمدەدى، ءبىراۇ دالەل ۇسىنبادى. ماريۋپول – ازوۆ تەڭىزىندەگى پورتتى قالا. جەرگىلىكتى بيلىك كەم دەگەندە 20 مىڭ ادام قازا تاپقانىن حابارلادى. قالاداعى قۇرىلىستاردىڭ 90 پايىزى قيراعان.

Abai.kz