اقپارات قۇرالدارىندا BI Group قۇرىلىس حولدينگىنىڭ سالىق تولەۋدەن جالتارعانى تۋرالى اقپارات تارادى، دەپ حابارلايدى Ulysmedia.kz.

وندا مەملەكەتتىك كىرىستەر كوميتەتى ايدىن راحىمباەۆقا تيەسىلى BI Group حولدينگىنىڭ 2021 جىلى جانە بيىلعى جىلدىڭ 4 ايىندا 900 ميلليون تەڭگە سالىق تولەۋدەن جالتارعانىن انىقتاعانى ايتىلعان.

ال قۇرىلىس حولدينگىنىڭ ءباسپاسوز قىزمەتى بۇل اقپاراتقا قاتىستى تۇسىنىك بەردى.

«اقپارات قۇرالدارىندا ايتىلىپ جاتقان تەكسەرۋلەر بارلىق زاڭعا نەگىزدەلگەن سالىق تولەۋشىلەر ءۇشىن جىل سايىنعى جانە تۇراقتى جۇرگىزىلەتىن تەكسەرۋ. سونداي-اق حولدينگ 2019-2021 جىلدارى شامامەن 100 ميلليارد تەڭگە سالىق تولەدى»، – دەدى BI Group وكىلدەرى.

بۇل جاعدايعا مەملەكەتتىك كىرىستەر كوميتەتىنىڭ وكىلدەرى دە تۇسىنىكتەمە بەردى. ايتۋلارىنشا، BI Group ءىس جۇزىندە قوسىمشا 0,9 ملرد تەڭگە سالىق تولەگەن. ونىڭ ۇستىنە بۇل سوما ۇلعايۋى مۇمكىن – حولدينگتەگى تەكسەرۋلەر جالعاسۋدا.

قازىرگى ۋاقىتتا مەملەكەتتىك كىرىستەر كوميتەتى سالىق جۇكتەمەسى تومەن قۇرىلىس سالاسىنداعى تولەۋشىلەرگە، ونىڭ ىشىندە BI Group كومپانيالار توبىنا قاتىستى سالىقتىق تەكسەرۋلەر جۇرگىزۋدە.

بۇعان دەيىن ماجىلىستە جامبىل احمەتبەكوۆ باستاعان بىر توپ دەپۋتات BI Group كومپانياسىن تەكسەرۋدى تالاپ ەتكەن بولاتىن.

Abai.kz